Hungary Mung Na San Pra ai Stephen a Poi Nhtoi (August 16) 16 August 2023

Hungary Mung Na San Pra ai Stephen a Poi Nhtoi (August 16)

San Pra ai Stephen gaw, dai aten na Hungary Mungdan a mare daju Gran kaw A.D (977) ning hta shangai chyahkai wa ai rai nga ai. Kawa gaw, Hungary amyu sha ni a mali ngu na uphkang du Geysa rai nna kanu gaw, Sarboth rai nga ai. Kanu yan Kawa gaw, hpung de shang wa ai hpang kasha hpe hpaji kaja lu sharin ya masai. Stephen a Sara ni gaw, Prague mare na San Pra ai Saradaw Adalbert hte makam masham myit kaba ai Italy amyu sha ginwang uphkang du Theodatus yan rai nga ai.

A.D (997) ning hta Stephen a Kawa n nga mat ai shaloi, kawa a hkang kaw shi bai galai la nu ai. Amyu sha ni hpe uphkang ai hpaji hte seng nna, Stephen gaw, Nu Maria a lata kaw ap da wu ai. Mung masha ni hpe dingman tara, simsa tara hte yu gawn ya ai. Matsan masha ni hpyi shawn ai hpe galoi mung madat ya nna myit daw dan let hkan shatup ai; hkrup mara kam ai myit jasat, superstitious customs hpe mung n hkap la ai; Karai Kasang hpe n gawn n sawn tsun kau ai ni, lagut ni hte num shaw, la shaw ai ni hpe ari dan  jaw ai.

Makam masham lam hte mungdan uphkang lam hta aten shama ai. Shi galaw ai amu shagu hpe galoi mung, Karai Kasang kaw ap tawn ai; mayak mang hkang hkrum ten hta lusha gam akyu hpyi ai, gam jaw ai amu magam ni hpe grai galaw shakut lai wa sai. Shi gaw, Karai Kasang hpe lam shagu a matu kam shamyet ai. Shi a langai sha re ai kasha shingtai Emeri gaw, shan shachyut sa ai kaw si mat wa sai rai nga ai. Dai shaloi Stephen gaw, “Karai Kasang gaw, Nye a kasha hpe tsawra ai; dai majaw, jau jau shi hpe woi la kau ya sai.” nga nna tsun ai.

San Pra ai Stephen gaw, majan hpe teng sha n ra ang yang n kam shabyin ai. Shi majan gasat ai lang nau n law ai raitimung, shi sa ai majan shagu hta awng dang lam lu la ai hkrai rai nga ai.

San Pra ai Stephen hpe A.D (1000) mi ning hta sau chya nna hkawhkam shatai ya ma ai. Wa Sarabyin Sylvster (2) gaw, shi a matu grai manu dan ai jan mau hpe Roma mare kaw nna shagun jaw ya ai. Dai Wa Sarabyin shagun jaw ya ai janmau gaw, shawa masha ni Stephen hpe hkawhkam shatai ya na matu hpyi shawn ai hpe, Wa Sarabyin shi hkum nan mung myit hkrum lawm ai, madi shadaw ya ai majaw shagun ya ai lam rai nga ai.

Hkaw hkam San Pra ai Stephen gaw, A.D (1038) ning, August shata (15) ya shani hta Madu hta yup pyaw ban sa mat wa sai rai nga ai. Shi hpe (Hungary mungdan hpe Laksan Makawp Maga ya ai San Pra ai Masha), “Patron of Hungary” nga nna masat shagrau ma ai. 

San Pra ai Stephen n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, August shata (16) ya shani ngu masat shagrau dat ya sai rai nga ai.

Daini Nawku Hpung gaw, Hungary Mung Na San Pra ai Stephen a Poi Nhtoi hpe galaw nga ai aten hta, Hkawhkam Stephen shi woi awn hkawmsa lai wa sai lam ni gaw, anhte a makam masham a matu, kasi la hpa, hkan sa shatup hpa ni nan rai nga sai re.

By;

Sister Rose Angeline Maran Nang Doi (SFX)

RVA-Kachin Service (Myitkyina)