Hungary Mung Na San Pra ai Elizabeth a Poi Nhtoi (November 17) 17 November 2023

Hungary Mung Na San Pra ai Elizabeth a Poi Nhtoi (November 17)

San Pra ai Elizabeth gaw, Hungary Mungdan a matu lak san kam shamyet mai ai San Pra ai Masha rai nga ai. Shi gaw, lai wa sai 1207 ning, July shata (7) ya shani hta, Pressurg mare kaw shangai chyinghkai wa ai rai nga ai. Shi a Kawa gaw, Hkawhkam Adrew (II) rai nga ai.

Shi gaw, asak grai naw grai kaji ten kaw nna, Thuringia mare na ahkang aya kaba lu ai Loius hte dinghku de lai wa sai. Shi a madu wa gaw, Elizabeth a hkum gawng shing-yan tsawm ai hte san seng san pra ai myit jasat hpe grai nan shakawn let arawng la wu ai.

Shi gaw, hkrun lam kaw nna nta de bai du wa shagu, shi a ningrum ningtau Jan Elizabeth hpe kumhpa wa jaw jaw re ai. Shi a Nrum ntau wa gaw, “Ngai gaw shi hpe kau da na malai, ja bum hpe she kau da na re” nga nna shi a madu jan a lam hpe tsun tsun rai nga nu ai. Dinghku de nna nau nna yang, du kaba Louis gaw, makam masham hte seng ai majan je ai de rawt sa mat wa ai. Dai shaloi, Otranto ngu ai shara kaw, machyi makaw kaba hkrum nna, n nga mat wa sai rai nga ai.

Madu wa Louis a moi mang hpe Germany mungdan de, bai la wa ma ai. Moi mang hpe mu ai shaloi jang Elizabeth gaw; “Nye a mungkan gaw si mat sai law! Nye a matu mungkan ntsa na myit pyaw lam ni yawng hkoi mat sai” nga nna a ja a wa hkrap let tsun lai wa ai. Shi a ningrum ningtau wa n nga mat ai raitim, shi gaw kun dinghku kaga mi bai n de sai lam daw dan kau wu ai.

Dai hpang, Elizabeth gaw, Third Order of St. Francis Mama Sasana Wuhpung de shang mat wa nu ai. Elizabeth gaw, machyi ai masha ni a matu, Marturg mare kaw tsirung gap ya ai. Dai tsirung kaw shi a hpang hpang de na asak prat shaning ni hta machyi masha ni hpe yu lajang let nga lai wa ai.

Ndai zawn rai, shakut nga yang, 1231 ning, November shata (17) ya shani, Shi a asak (24) ning du ai shaloi, Madu kaw yup pyaw ban sa mat wa sai rai nga ai. Shi a wenyi hte seng ai Jau gaw, Elizabeth hte seng nna, “machyi masha ni, matsan masha ni a matu n rau n htau rai hkra amu galaw kin hkawm timung, shi daram myit asim sha nga ai masha nau nmu ga n ngai” nga nna tsun shakawn lai wa sai.

Elizabeth n nga mat ai hpang, 1235 ning, May shata (27) ya shani, dai aten na, Wa Sarabyin Gregory (9) kawn, shi hpe San Pra ai Masha dan dat let, Shi a Poi Nhtoi hpe mung, November shata (17) ya shani ngu masat shagrau dat ya sai rai nga ai.

Daini Nawku Hpung gaw, Hungary mung na, San Pra ai Elizabeth a Poi Nhtoi hpe galaw nga ga ai aten hta, anhte a prat hta mung, San Pra ai Elizabeth zawn, yawng a matu, mai kaja ai magam bungli hta hpang hkrat ai ngu ai n nga ai re majaw, tinang mai byin ai aten ni hta matsan mayan, machyi makaw hkrum ai ni a matu daw jau lu ai ni byin tai nga ga law.  

By;

Sister Rose Angeline Maran Nang Doi (SFX)

RVA-Kachin Service (Myitkyina)