Hpyen Ma Latsa Up Du Kaba San Pra ai Marcellus a Poi Nhtoi (October 30) 30 October 2022

Hpyen Ma Latsa Up Du Kaba San Pra ai Marcellus a Poi Nhtoi (October 30)

San Pra ai Hpyen Du kaba Marcellus gaw, Hkawhkam Maximian a hkaw kata na hpyen ma latsa up ai du kaba langai rai nga ai.

Hkawhkam Miximian gaw, A.D 298 ning hta shi a shangai poi hpe grai hkik hkam ai hku n na galaw shangun ai sha n-ga, dai poi hta nat hpara hpe shawa yawng hpe e, nawku hkungga shangun wu ai. Raitimung, Du kaba Marcellus chyawm gaw, dai lam tsep kawp n hkan shatup ya ai. Dai sha n-ga shi hpe shagrau da ya ai tsabyi lakung dazik lawm ai palawng hpe bai raw ya kau nna; “Ngai gaw Hristian Masha Majing Re” nga nna shawa a man kaw e, adan aleng tsun shapraw wu ai. Dai majaw, hpyen ma hking up ai Du Daju gaw, Du kaba Marcellus hpe htawng kaw rim bang kau shangun wu ai.

Raitimung, Du up langai mi gaw, Marcellus hpe Hkawhkam Maximian kaw hpang de, woi sa wa ntawm, Marcellus hpe e, Fransik Mungdan hte Spain Mungdan hpe up hkang ai Caesar Constantius kaw woi sa na matu hpyi nem wu ai. Raitim, tara agyi Aurelian Agricolus hpang de  she, woi sa na matu daw dan kau ya wu ai.

Du Kaba Marcellus gaw, shi hpe mara shagun ai lam ni yawng hpe n nyet ai sha hkam la lai wa sai. Shaloi, shanhte a ga hpe n gawn n sawn di ai ngu nna, shi a baw hpe kahtam di kau na matu daw dan ma ai. Ndai bawng ban ai lamang hpe ka matsing ai chyare wa gaw, “Ndai daw dan ai gaw teng sha n tara ai daw dan ladat ai she re” ngu nna n hkrit n tsang ai sha tsun hpaw wa nu ai. Dai majaw, dai chyare hpe mung, htawng kaw rim bang kau nna masum ya na ai hpang, shi a baw hpe kahtam di kau ya ma ai. San Pra ai Du Kaba Marcellus hpe mung, October shata (30) ya shani hta e sat kau ma ai.

Dai zawn rai nna, Hkristan Makam Masham re ngu nna, gwi gwi hte  tsun lai wa ai Du Kaba Marcellus hpe sat kau lai wa tim, Shi hpe Nawku Hpung kawn gaw, San Pra ai Masha ngu shagrau ya let, Shi a Poi Nhtoi hpe mung, Shi hpe sat kau ai shani rai nga ai, October shata (30) ya shani masat dat ya sai rai nga ai.

Daini Nawku Hpung gaw, San Pra ai Du Kaba Marcellus a Poi Nhtoi hpe galaw nga ga ai aten hta, anhte a prat hta mung, San Pra ai Du Kaba Marcellus kaning re ai magam bungli ni galaw shakut hkawmsa taw nga ai raitim, tinang a makam masham hte seng nna galoi mung n hkrit n tsang ai sha sakse hkam lu ai ni byin tai nga ga law.

By;
Sister Rose Angeline Maran Nang Doi (SFX)
RVA-Kachin Service (Myitkyina)