Hpyen Ma Latsa Up Du Kaba San Pra ai Marcellus a Poi Nhtoi (October 30)

San Pra ai Hpyen Du kaba Marcellus gaw, hkawhkam Maximian a hkaw kata na hpyen ma latsa up ai du kaba langai rai nga ai.

Hkawhkam Miximian gaw, A.D 298 ning hta shi a shangai poi hpe grai hkik hkam ai hku n na galaw shangun ai sha n-ga, dai poi hta nata hpara hpe shawa yawng hpe e, nawku hkungga shangun wu ai. Du kaba Marcellus chyawm gaw, dai lam tsep kawp n hkan shatup ya ai. Dai sha n-ga shi hpe shagrau da ya ai tsabyi lakung dazik lawm ai palawng hpe bai raw ya kau nna; “Ngai gaw Hristian Masha Majing Re” nga nna shawa a man e kaw adan alung tsun shapraw wu ai. Dai majaw, hpyen ma hking up ai du kaju gaw, Du kaba Marcellus hpe htawng kaw rim bang kau shangun wu ai.

Raitimung, Du up langai mi gaw, Marcellus hpe Maximian kaw woi du ntawm, Marcellus hpe Fransik Mungdan hte Spain Mungdan hpe up hkang ai Caesar Constantius kaw woi du na matu hpyen nem wu ai. Raitim, tara agyi Aurelian Agricolus hpan gde woi san a matu daw dan kau ya wu ai.

Du Kaba Marcellus gaw, shi hpe mara shagun ai lam ni yawng hpe n nyet ai sha hkam la lai wa sai. Shaloi, shanhte a ga hpe n gawn n sawn di ai ngu nna, shi a baw hpe kahtam di kau na matu daw dan ma ai. Ndai bawng ban ai lamang hpe ka matsing ai chyare wa gaw, “Ndai daw dan ai gaw teng sha n tara ai daw dan ladat she re” ngu nna n hkrit n tsang ai shat sun hpaw wa ai. Dai majaw, dai chyare hpe mung, htawng kaw rim bang kau nna masum ya na ai hpang, shi a baw hpe kahtam di kau ya ma ai. San Pra ai Du Kaba Marcellus hpe mung, October shata (30) ya shani hta e sat kau ma ai.

San Pra ai Du Kaba Marcellus a labau hpe hti hkaja la nna, anhte a prat hta mung, kaning re ai magam bungli ni galaw shakut hkawmsa taw nga ai raitim, tinang a makam masham hte seng nna galoi mung n hkrit n tsang ai sha sakse hkam lu na atsam jaw ya rit ga matu, Karai Kasang Wa kaw akyu hpyi la nna, sak hkrung hkawm sa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)