Hpaji Ninghkring San Pra ai Gildas a Poi Nhtoi (January 29)

San Pra ai Gildas gaw, laika sharin ai lam hta mying grai kaba nna, English amyu sha ni a labau chye ai Sara Kaba mung rai nga ai. San Pra ai Gildas gaw, A.D 500 ning hta England mungdan, Clyde layang pa kaw shangai chyinghkai wa ai rai nga ai.

Bai nna, shi gaw Celtic (Moi na English Hpan) amyu sha ni a langai sha re ai labau laika ka ai Sara mung rai nga ai. Shi ka ai labau laika hta e, Roma amyu sha ni England mungdan de nnan shang wa ai aten kaw nna, San Pra ai Gildas a aten du hkra laman hta English amyu sha ni galaw lai wa ai n hkru n kaja ai magam ni hpe mara shagun da nga ai. Shi hpe “Hpaji ningtawn ai Gildas” nga nna shagrau shakawn da nga ai.

Shi gaw, shanhte English amyu ni a n hkru n kaja ai myit jasat lailen ni hpe n makoi n magap ai sha, n hkrit n tsang rai ka madun ai majaw, Wales mungdaw de hprawng yen nga ra mat ai. Wales mungdaw de du ai shaloi dinghku de ai. Raitimung, shi a sak (20) ning sha naw rai yang Madu jan si mat ai wu ai.

San Pra ai Gildas gaw, Karai Kasang a lam hpe chyu sha madung tawn nna myit sumru yu let nga chye ai. Shi gaw, Ireland Mungdan kaw na San Pra ai Illtud kaw na laika hpaji sharin lai wa sai. A.D 520 ning hta Roma mare de hpung amu hte seng nna hkrun lam sa du kau da wu ai.

Shi gaw, Brittany ginwang, Ruys mare kaw, Jau jawng langai mi gap da ya lai wa sai rai nga ai. Dai jawng kaw nga let, Karai Magam gun shakut nga ai ten, shi a makau grup grup kaw shi a hpang hkan ai jau ni jawm akyu hpyi ya nga ai kaw, myit ngwi myit pyaw simsa let, A.D 570 ning, January shata (29) ya shani, Madu hta yup pyaw ban sa wa sai rai nga ai.

San Pra ai Gildas n nga mat ai hpang, Nawku Hpung gaw, shi hpe San Pra ai masha dang dat let, shi a Poi Nhtoi hpe mung, January shata (29) ya shani masat shagrau dat ya sai rai nga ai.

Daini Nawku Hpung gaw, San Pra ai Gildas a Poi Nhtoi hpe galaw nga ai aten, anhte mung, tinang a kadun la ai asak aprat hta e, Madu Karai Kasang Wa myit ra ai hku nna sak hkrung hkawmsa lu na atsam jaw ya rit ga matu, lak san akyu hpyi la nga ga law.

By;

Sister Rose Angline Maran Nang Doi (SFX)

RVA-Kachin Service (Myitkyina)