Hpa Majaw Si Mat Sai ni Yawng a Matu Akyu Hpyi Ya Ra ai Kun (November 2)

Daini e, Chyoipra ai Kahtawlik Nawku Hpung gaw, nga-rai mung kaji (snr) Purgatorium kaw naw nga ai, si mat sai ni a wenyi ni a matu, alak mi akyu hpyi myit dum ai nhtoi rai nga ai. Purgatorium ngu ai shara gaw, shut hpyit mara kaji a matu ari dan hkam shatup sai wenyi ni hpe, prat dingsa ngwi pyaw simsa ai ja mungdan de woi du na mahka e shatsawm shapra ya ai shara, shing nrai masat tawn da ai tsang hpe Purgarotium ngu shamying ai ria nga ai.

Purgatorium kaw du nga ai ni a Wenyi ni gaw, Karai Kasang hpe mu mayu di kai myit hkam sha nga ai ni rai nga ai. Shanhte gaw, dai pyaw ngawn simsa di kai shara de lawan du n du hkraw ai majaw, myit hta gatu nga nna hkam sha nga ma ai. Nga-rai Di hte Sumsing Mungdan gaw, prat tup a grin nga ai shara nga nna masat da ai shara rai nga ai. Raitimung, Purgatorium ngu ai gaw, shatsai shatsawm ai shara (snr) tsang rai nga ai. Purgatorium ngu ai tsang gaw, hpang jahtum tara je yang daw dan ai nhtoi hta gaw, htum mat, prai mat na shara, tsang rai nga ai. Dai Purgatorium kaw na wenyi ni a matu, anhte ya dinghta ga hta asak naw hkrung nga ai ni gaw, alu jaw ya ai, akyu hpyi ya ai, Misa Hkungga nawng ya ai lam ni rau teng sha garum ya lu nga ai, anhte hta lit mung nga ga ai re.

Purgatorium ngu ai teng sha nga ai lam hpe Chyum Mungga hta sakse mu lu nga ai re. Mahkabi Laik (2) hta, Yuda Mahkabi gaw, lakhpoi ni gali let majan pa kaw hkrat sum mat ai shi a hpyen ma ni a matu, Yeruslem mare na Nawku Htingnu kaw akyu hpyi ai lamang galaw ya ai gaw, sakse majing nan rai nga ai. Dai majan pa kaw hkrat sum mat ai ni gaw, htani htana ngwi pyaw ai shara de mung n du lu ai; shanhte gaw, lakhpoi ni hpe kam nna majan je sa ma ai raitim, shanhte gaw, prat dingsa grin nga ai Nga-rai dan hte mung n ging nga ai. Hpa majaw nga yang, shanhte gaw Karai Kasang a Chyoi Pra ai makam masham hte seng majan je sa ai ni rai nga ma ai. Dai majaw, shanhte gaw Purgatorium ngu ai Jasan shatsawm ai kaw naw du ran a sha rai nga ma ai. Chyum Laika hta; “Shi gaw, si mat wa sai ni galaw kau sai shut hpyi mara kaw nna mara raw shalawt ya ai hkrum lu na matu, shanhte a malai hkyamsa hpyi nem ya wu ai.” (2 Mahka 12:46) nga nna ka da nga ai.

Si mat wa sai ni a matu, akyu hpyi ya ra ai ngu nna, Nawku Hpung gaw, Ndai November shata tup hpe masat da ya ai re majaw, anhte hpung masha ni mung, n nga mat wa sai, tinang a dum nta masha ni hte hpu nau ni yawng a matu, akyu hpyi garum ya nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)