Hkawhkam Jan Nu Maria Poi (Sh) Queenship of Mary (August 22)

Nu Maria hpe Hkawhkam Jan masat shagrau shagrin ai masing hpe 1954 ning hta, Wa Sarabyin Pius (II) gaw, shi a mungkan ting shabra ai laika, Encyclical “Ad Caeli Reginam” “Lamu a Hkawhkam Jan hpang de” ngu mying ai laika shapraw nna masat shagrau da ya sai. Ndai Poi lamang gaw, Nu Maria Lamu de Woi Shalun La Hkrum ai Poi a hpang, Nu Maria hpe Lamu hte Ga Hkawhkam Jan Janmau gup shagrau masat ya ai rai nga ai. Ndai Poi lamang gaw, Kabu Gara Shiga ka ai San Pra ai Yawhan a Shingran Laika hta: “Lamu hpungtang kaw lamik kumla kaba dan pru ai: jan hpe hpun dagraw da nna shata jan hte lagaw magap tawn nga ai, baw ntsa kaw shagan shi lahkawng hte re ai janmau gup tawn ai amyu shayi hpe mu lu ai.” (Shingran 12:1). Ndai zawn laksan shagrau hkrum ai gaw, Karai Kasang a Kanu rai nga ai majaw sha n-ga, Madu a Ga hpe kam ai majaw rai nga ai. “Numsha langai mi gaw, nang hpe gun ai hkritung hkriwang hte nang chyu ai madoi chyu hpang gaw, a-nga lit dai, nga nna tsun ai; shaoi Yesu gaw: Rai sa, Karai Kasang a Mungga madat la nna hkan nang ai ni gaw alu ma ai.” ngu wu ai. (Luka 11:27-28)

Daini, Nawku hpung gaw, Hkawhkam jan Nu Maria a Poi Nhtoi hpe galaw nga ga ai hte maren, grau nna anhte hte Karai Kasang Wa, Madu Yesu ni a lapran hta Nu Maria htinglu htinglai hpyi garum ya nna, ya aten byin nga ai, (COVID-19) Ana zinli lawan hkoi san mat wa u ga matu, ja ja akyu hpyi shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)