Hippo Mare na San Pra ai Augustine a Poi Nhtoi (August 28) 28 August 2023

Hippo Mare na San Pra ai Augustine a Poi Nhtoi (August 28)

San Pra ai Augustine gaw, A.D (354) ning, November shata (13) ya shani hta Dingdung Africa, Tagaste mare dai daw rai nna, August shata (27) ya shani Poi Nhtoi ang ai San Pra ai Monica a kasha mung rai nga ai. Augustine gaw, Shi a kanu San Pra ai Monica kade akyu hpyi ya nga timung, kawa Patricius a tara maigan myit jasat hte sak hkrung nga lai wa sai.

Augustine gaw, Shi a asak (29) ning du ai shaloi, Italy mungdan de sa wu ai. Lani mi milan mare na, San Pra ai Saradaw Ambrose a tara mungga hpe sa na nna grai myit lawm mat ai. Dai hta n-ga, Lani mi na nhtoi hta shi nga ai nta makau na ma kasha langai mi gaw, “Rawt u, hti u / Tolle, Lege” nga nna mahkawn hkawn nga ai hpe na wu ai. Shaloi shi a makau kaw na Chyum Laika hpaw dat yang: “Madu Yesu hpe hpun dagraw da mu, hkum shan a ra marin ai a matu hpa mung hkum myit, hkum mahkawng nga mu.” nga ai hpe hti hkrup wu ai. Ndai ga si ni gaw, shi hpe galai shai shangun sai.

Augustine gaw, shi a asak (32) ning du ai shaloi she, Chyoi Pra ai Kru Ya shani hta, San Pra ai Saradaw Ambrose a lata kaw, kashin kamun hkam la lu sai. Dai hpang gaw, shi a asak hpe Karai Kasang kaw prat tup ap kau nu ai. A.D (395) ning hta Hippo mare na Saradaw aya dang da hkrum sai. Shi gaw, Sagurem kaja hte ningtawn ai laika ka Sara, Sanpra ai masha tai wa sai rai nga ai.

Saradaw Augustine gaw, Jau ni wuhpung rai nna nga na matu zinlum ya ai hte amyu shayi hpung magam gun ni a matu hkan sa tara hkrang mung ka da ya sai. Hpung masha ni hpe: “Ngai gaw nanhte a matu Saradaw re; nanhte hte rau Hkristian Hpung masha re.” “For you I am a Bishop. With you I am a Christian.” nga nna Saradaw Augustine tsun tsun rai wu ai.

A.D (410) ning hta, Roma mare hpe tai hpyen ni zing la kau ai shaloi, Saradaw Augustine gaw, “Karai Kasang a Mare,” the City of God, mying ai laika buk langai mi ka da ai. Dai laika kaw e, “Roma mare zing la kau hkrum ai gaw, Hkristian Hpung masha ni a mara a majaw n re; mare a n se n sa amu hte shut hpyit mara ni a majaw dingman tara ai hku nna Karai Kasang ari dan jaw ai she re.” nga nna ka da nga ai.

Share shagan Saradaw Augustine gaw, Hippo mare hpe masha shatsai amyu rai nga ai Vandals ni wang shing grup taw ai, A.D (430) ning, August shata (28) ya shani, shi a asak (75) ning hta, Madu kaw yup pyaw ban sa mat wa sai rai nga ai.

San Pra ai Augustine n nga mat ai hpang, Nawku Hpung kawn shi hpe San Pra ai Masha dang dat let, Shi a Poi Nhtoi hpe hpe mung, August shata (28) ya shani masat shagrau dat ya sai rai nga ai.

Daini Nawku Hpung gaw, San Pra ai Augustine a Poi Nhtoi hpe galaw nga ga ai aten hta, anhte a prat hta kaning rai mi sak hkrung hkawmsa lai wa saga ai raitim, myit yawn myit malai let prat n nan, myit n nan hte bai hkawmsa lu na matu, San Pra ai Augustine gaw anhte a matu kasi hte n gun jaw ya sai rai nga ai.  

By;

Sister Rose Angeline Maran Nang Doi (SFX)

RVA-Kachin Service (Myitkyina)