Gerhardinger Mying ai A Lu ai Teresa of Jesus a Poi Nhtoi (May 9) 09 May 2023

Gerhardinger Mying ai A Lu ai Teresa of Jesus a Poi Nhtoi (May 9)

Yesu a Teresa mying ai A Lu ai Teresa gaw, Germany Mungdan, Regenberg Mare na Bungli galaw sha ai kanu yan kawa kawn, lai wa sai 1797 ning, June shata (20) ya shani shangai chyinghkai wa ai rai nga ai. Shi a Kashin Kamun mying gaw, Caroline Gerhardinger ngu ai re. Shi hpe, Kanu yan Kawa gaw, Hkristan Laika Hpaji hpe atsawm sha sharin matsun da ya ma ai.

Shi a asak (6) ning sha naw re ai aten kawn, shi gaw, Canossian Mama ni a San Augustine Laika Sharin Jawng kaw hpaji sharin la hpang lu sai. Raitimung, dai Mama Wuhpung hpe Asuya ni kawn, 1809 ning hta dai Jawng kaw nna gawt shapraw kau ai majaw, htum hkrai laika hpe n lu sharin la lu nu ai. Shi hpe Saradaw Michael Wittman kawn Hkristan Hpaji hte Karai Kasang hpe daw jau na myit jasat ni dawk bang ya wu ai.

1828 ning hta, Nawku Hpung hte Bavaria ginwang asuya a lapran myit hkrum ai masat masa lam galaw la lu ma ai; dai majaw, Mama ni a Laika sharin jawng ni hpaw na ahkaw ahkang bai lu wa ma ai. Dai hpang Caroline hte Shi a manang ni gaw, Hkristan Laika Hpaji a matu, myit da ting shakut sa wa na lam jahkrup la ma ai. Hkawhkam Ludwig saw shaga nna Ja Gumhpraw garum ya ai majaw, Laika sharin ai Poor Clare Mama Jawng hpe hpaw la lu ma ai. Caroline gaw, Teresa of Jesus ngu ai mying hpe la nhtawm Natre Dame Laika Sharin Mama Wuhpung “School Sisters of Notre Dame” hpe woi awn shakut nna hpaw da lu ma ai. Dai Laika Sharin Mama Wuhpng a atsam marai hte shakut shaja ai sat lawat a majaw, Dai Mama Wuhpung hpe 1854 ning hta Wa Sarabyin a madi shadaw masat shagrin ya ai hpe hkrum masai rai nga ai.

A Lu ai Teresa of Jesus gaw, 1879 ning hta, Madu kaw yup pyaw ban sa mat wa sai rai nga ai.

Shi n nga mat ai hpang, 1985 ning hta, dai aten na San Pra ai Wa Sarabyin Yawhan Pawlu (2) kawn, Shi hpe A Lu ai Masha ngu masat shagrau dat let, Shi a Poi Nhtoi hpe mung, May shata (9) ya shani ding yang galaw ya taw ai rai nga ai.

Daini Nawku hpung gaw, Gerhardinger Mying ai A Lu ai Teresa of Jesus a Poi Nhtoi hpe galaw nga ga ai ten hta, anhte hpung masha ni mung, A Lu ai Teresa of Jesus zawn, tinang chyoi chye da ai hpaji ningli ni hpe gam garan chye ai ni byin tai lu hkra shakut sa wa ga law. 

By;

Sister Rose Angeline Maran Nang Doi (SFX)

RVA-Kachin Service (Myitkyina)