Fulcheri Mare na A-lu ai Damian a Poi Nhtoi (October 26) 26 October 2023

Fulcheri Mare na A-lu ai Damian a Poi Nhtoi (October 26)

Fulcheria Mare na, A-lu ai Damian gaw, tara hkaw ai lam hta grai ning tawn ai wa rai nga ai. Shi lang ai tara hkaw ga si ga ngau ni gaw, Karai Kasang a mungdan lam maden shajat ai lam hta grai tang du ai.

Shi gaw, tsa ban (15) hta, Italay Mungdan, Genoa mare makau na, Petri ngu ai shara hta shangai chyinghkai wa ai rai nga ai. Kaji ai aten kaw nna shi gaw, Sumsing lamu kaw na mau hpa lamik kumla law law mu yu ai. Damian grai naw kaji ai nga yang, myit n-gring ai masha langai mi gaw, shi hpe sa lagu la kau wu ai. Shi hpe aten grai na hkra hkan tam ai hpang, mau hpa mabyin byin ai. Dai lam gaw, Damian hpe makoi da ai shara hta grai htoi tu taw ai majaw, shi hpe bai mu tam la ma ai.

A-lu ai Damian gaw, Savona mare kaw na Dominican Tawra Jau jawng de sa nga ai. Dai Wuhpung kaw sasana magam gun tai ai hpang, Italy Mungdan ting tara hkaw hkawm mat wa sai. Shi shadum jahprawng, sharin shaga ya ai majaw, masha law law wa, san seng san pra ai nga sat nga sa lam hta sak hkrung mat wa manu ai. Lamik kumla magup mung madun lu ai shaman chyeju atsam shi lu la wu ai.

A-lu ai Damian gaw, 1484 ning hta Reggio D.Emillia Mare kaw e, Madu hta yup pyaw mat wa sai rai nga ai.

1848 ning hta, Hpung masha ni gaw, Damian hpe hkungga shagrau lu na matu, dai aten na Wa Sarabyin Pius (9) gaw, shi hpe A-lu ai Masha ngu nna shagrau dat let, Shi a Poi Nhtoi hpe mung, October shata (26) ya shani masat dat ya sai rai nga ai.

Daini Nawku Hpung gaw, Fulcheri Mare na A-lu ai Damian a Poi Nhtoi hpe galaw nga ga ai aten hta, anhte hpung masha ni mung, A-lu ai Damian zawn, tinang lu da sai makam masham hpe, tinang a makau grup yin hkan na ni hpe bai gam garan let, kasi madun dan lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)