Finland Mungdan na San Pra ai Henry a Poi Nhtoi (January 19)

Saint Henry (Bishop of Finland)_(January 19)

Saint Henry (Bishop of Finland)_(January 19)

San Pra ai Henry gaw, English amyu sha rai nga ai. Raitimung, shi gaw, Italy Mungdan, Roma mare kaw sha nga kaba lai wa ai. Dai aten hta, Sarabyin a Dat Kasa rai nna hpang de, Sarabyin Adrian (IV) byin tai wa ai Saradaw Kaba gaw, Jau Henry hpe 1152 ning hta, Sweden Mungdan Uppssala Mare a matu Saradaw lit shatsam ya sai rai nga ai.

Dai aten hta, Hkristan makam masham hte simsa lam hte seng nna myit n hkrum hkraw ai Finland Mungdan hte Sweden Mungdan yan shada da majan byin nga ai aten rai nga ai. Saradaw Henry gaw, Sweden hkawhkam San Pra ai Eric maga de lawm nga ai. Shada da lapran na majan hta Sweden mungdan dang mat wa ai.

Dai majaw, Saradaw Henry gaw, Finland Mungdan a mare daju rai nga ai Oslo mare kaw nga nhtawm, Finland amyu sha ni law law hpe makam masham de lu woi gale la nu ai. Bai nna, shi gaw Nousis mare kaw mung, Nawku Jawng langai mi gaw gap nhtawm dai hpe shi a ginjaw shatai lai wa wu ai.

1156 ning, January shata (20) ya shani hta Saradaw Henry n myit madat ai lam hkrum sha nu ai. Dai lam gaw, Nawku hpung de gale shang wa ai Lalli mying ai Finland amyu sha hpyen la langai mi gaw, Shweden amyu sha langai mi hpe sat kau ai majaw, Saradaw Henry gaw, dai wa hpe Nawku Hpung kaw nna shapraw kau ai.

Lalli gaw, myit machyi ai majaw, Saradaw Henry hpe ningwa hte nan du kaw sa kahtam sat kau sai rai nga ai. San Pra ai Saradaw Henry a moimang hpe Nausis mare kaw makoi mayang da ai rai nga ai. Dai shi a Lupwa kaw na lamik kumla law law madun ya nga ai lam labau hta ka shalawm da nga ai.

San Pra ai Henry gaw, Nawku Hpung kata kaw na dingman tara hte seng nna n hkrit n tsang ai sha matsun maroi a majaw, shi a sak hkrung lam a matu grai jam jau hkrum ai hpang sat kau ai hkrum sai rai nga ai.

Shi n nga mat ai hpang, Nawku Hpung gaw, Saradaw Henry hpe San Pra ai Masha dang dat let, shi a Poi Nhtoi hpe mung, January shata (19) ya shani masat shagrau dat sai rai nga ai.

Wa Saradaw Herny a Labau kadun hpe hti hkaja yu ai shaloi, anhte a prat hta mung, tingnang lu da ai makam masham a majaw, yak hkak jam jau lam, jahkrit shama lam ni byin hkrum wa chye ai hpe mu lu nga ai re, dai zawn rai nna byin hkrum hkra wa ai aten hta, hkam jan lu na atsam jaw ya rit ga matu, San Pra ai Henry kaw akyu hpyi let, n gun la nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

 

Add new comment

10 + 3 =