Fatima na, San Pra ai Jacinta Marto a labau lam (daw1) 05 Oct, 2019

Fatima na, San Pra ai Jacinta Marto a labau lam   (daw1)

Nuwa Hpunau ni, anhte a na hta galoi mung na ga taw nga chyalu rai nga ai, Fatima mare hta, Nu Maria Dan Pru ai lam hpe yawng gaw chye chyalu rai nga ga ai. Nu Maria Dan pru ai shaloi mu lu ai marai masum gaw, Lucia, Francisco hte Jacinta ni rai nhtawm me, lawu lahta kahpu kanau daw ang ai ni mung rai nga ma ai. Shingrai, ndai lamang hta gaw, San Pra ai Jacinta a labau hpe gam garan ya mayu nngai. Jacinta hpe, 1910 ning, March shata 11 ya shani, Portugal Mungdan Aljustrel ngu ai Fatima hte nau ntsan ai mare kahtawng hta Kawa Manuel Pedro Ti Marto hte Kanu Olympia De Jesus yan kaw nna, shangai chyinghkai wa sai rai nga ai. Francisco a kanau majing mung re. Shanhte marai masum hpe Nu Maria gaw, (6) lang ting dan pru dan lai wa sai rai nga ai. Dai aten hta, Lucia gaw, asak (10) ning, Francisco gaw (9) ning hte Jacinta gaw, asak (7) ning sha naw rai nga ma ai. Shing rai, Nu Maria gaw, shata shagu a (13) ya ngu na shani, aten mung bung ai shaloi, galoi mung dan pru lai wa sai rai nga ai. Shanhte marai masum hpe shawng nnan lang dan pru dan ai gaw, 1917 ning, May shata (13) ya shani, Cova Da Iria ngu ai shara hta, Mungkan Simsa lam lu wa na matu, Rosary Hti akyu hpyi na matu hpyi lajin lai wa sai. Dai aten, Jacinta gaw, n gwi let shingdu kawn lagyim yu taw nga ai, nga nna labau hta ka da nga ai.

Bai, dai shani a matu malu masha hpe Hkaulan Mam hte galaw da ai muk rau, Cheese ngu ai Htawbak la sa ma ai. Dai shani shanhte mu lu ai, na lu ai lam ni hpe kadai hpe mung hkum tsun dan lu yaw ngu nna, kaji dik htum rai nga ai Jacinta hpe ginhtim da ai shaloi, um um nga yau la nna, Gat kaw na, kanu yan kawa du wa ai hte “Oh..Ahnu, daini anhte a Hkawhkam jan hpe mu saga ai ngu tsun dan ai shaloi, Kanu gaw, mani kau ya ai, raitim, Kawa gaw, kasha tsun ai hpe kam ai. Kahpu Franciso mung, kanau tsun ai hpe madi shadaw let hpawn, shi hkum nan mu lu, na lu ai lam ni hpe hpaw tsun dan nu ai. Bai mau hpa langai mi gaw, dai Nu maria No (1) lang dan pru ai, August Shata (13) ya shani, dai ahkying hta nan, Vatican na, Cistine Chapel ngu ai Nawku Htingnu kaji hta, Wa Sarabyin Benedict XV kawn, htawm e, Fatima a Sarabyin ngu nna mying kaba wa na, Wa Sarabyin Pius XII byin wa na rai nga ai, Saradaw Nnan Eugene Paceli hpe lata dat ai nhtoi shani rai nga ai. 1917 ning, May shata (27) ya shani, Fatima a Ginwang up Jau Manuel Margues Ferreira hpe, Lucia a kanu, Maria Rosa mung, dai ten na mabyin lam ni sa tsun dan ai shaloi, dai Jau gaw, ma ni  masu nna tsun ai mabyin ni hpe n mai hkap la ya ai, ngu bai htang tsun dat nu ai. Ndai zawn rai shiga brawng mat wa ai mung, kadai hpe hkum tsun dan yaw ngu nna, gin htim da nga ning len, Kanu yan Kawa hpe tsun hpaw dan ai Jacinta a majaw mung rai nga ai.

Dai majaw, Jacinta hpe Jau, San ai, hpa majaw, Jacinta hpe dai Hkawhkam Jan gaw, ga nshaga a ta? ngu san ai shaloi, Lucia hkum nan, shi a shinglet ja taw ai majaw re, lama na Shi ga shaga jang, dai Hkawhkam jan mung shi hpe ga shaga wa na rai nga nu ai, ngu kajau htai dat ya ai. Jacinta chyawm gaw, gaya ai hte hpawn, dai shanhte mu lu ai hkawhkam jan hpe ga shaga na matu n shakut lai wa ai. Dai zawn rai nna, ginwang up Jau, ma ni hpe ga san ga htai galaw ngut ai hpang, um.. ndai ma ni hpe Tsadan wa e shang nna bungli galaw nga sai, ngu hpaji jaw dat nu ai. Shaloi Lucia gaw, kajawng hkrit mat wa ai hte rai nna, Jau mung, shanhte hpe myit pu hkra galaw dat nu ai. Dai majaw, Lucia gaw, e e… shi masu ai re ngu, masha shagu hpe tsun hkawm u, ngu dat nu ai, shaloi, Francisco hte Jacinta yen nau gaw,  dai gaw, masu ai re i? ngu tsun let pawt ka-un lai wa masai lam labau hta mu hti lu nga mali ai nuwa ni. Bai, no (2) lang dan pru dan ai gaw, 1917 ning June shata (13) ya shani rai nga ai. Shawng na shata dan pru dan lai wa ai, Cova Da Iria ngu ai shara hta sha rai nna, Nu Maria gaw, dai ma ni hpe, “Karai Kasang Wa gaw, Mungkan masha ni hpe kade daram tsawra ai ngu ai lam hpe ngai a san seng ai salum hta madun dan shangun ai” ngu tsun dan wu ai. Dai (2) lang ngu na hta, masha marai (50) ram du zup lai wa sai rai nga ai. Shing rai, Nu Maria dan pru ai shara hta, shadaw jun let nta kasha zawn re ai galaw na matu, Maria Da Capelinha ngu ai jan myit daw dan lai wa sai lam, labau hta mu hti lu nga ai. Nu Maria a (3) lang ngu na dan pru ai nhtoi gaw, 1917 ning, July shata (13) ya shani rai nga ai. Dai lang gaw, masha grau grau law jat wa ai hte marai (5000) ram pyi du mat sai rai nga ai.

1917 ning, Augutst (13) ya shani gaw, Mali lang ngu na, Nu Maria dan pru ai shani rai nga ai. Dai shani gaw, Portugal mungdan, Alqueidao ngu ai mare na, Wajau Francisco Da Rosa hte Wajau Oliveira yen woi awn ai Choir Group ni mung sa du shang lawm lai wa masai. Dai hpang, Uphkang du, Santos kaw nna, shanhte marai masum hpe shaga la nhtawm, Nu Maria nanhte hpe hpa ni tsun ai rai, yawng anhte hpe tsun dan ra ai ngu, sau prut taw nga ai, Di Dam kaba hpe madun let jahkrit shama galaw lai wa nu ai. Shaloi, Jacinta gaw, hkrap ai hte hkrit ai hte rai nga sanu ai. Shi si na hpe hkrit tsang ai nrai, shi a chyinghkai Kanu hte nlu hkrum sana hpe hkring tsang ai majaw rai nga ai. Dai hpang Francisco hpe bai jahkrit shama masai, hpang jahtum Lucia a aten du yang, shi a lawu lahta kanau yen  asak naw hkrung nga ai hpe mu taw nga nu ai. Ya na zawn, dai Du slg. wa a ga san hpe nhtai lai wa ai majaw, shanhte marai masum hpe August shata (15) ya shani bai dat dat nu ai. Hpang jahtum shanhte yawng, Nu Maria hpe jaw da ai Ga sadi sa shatup na matu, Fatima de bai rawt sa mat wa ma ai lam gam garan ya let ngam nga ai daw hpe du na lamang hta bai hkap madat la nga ga.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.