Fatima Mare na, San Pra ai Jacinta Marto a labau lam (Daw2) 12 Oct, 2019

Fatima Mare na, San Pra ai Jacinta Marto a labau lam   Daw2

Nu wa hpu nau ni, Jancinta, Francisco the Lucia yen nau ni hpe (4) lang ngu na, Nu Maria dan pru ai gaw, 1917 ning, August shata (19) ya shani rai nga ai. Dai shaloi ma ni hpe Nu Maria tsun ai gaw, “Mungkan masha yawng ngu nan htan, mara lu ai wa langai a majaw, kabu myit pyaw lam lu na matu ra ahkyak nga ai lam tsun lai wa sai” Grai myit shang sha hpa gaw, dai shani she Jacinta hpang hkrat taw nga ai, Raitimung, Jacinta du sa wa ai aten ri ri hta dan pru dan sai. Bai shanhte a nta htingbu ni tsun ai hta, shi a kasha Jacinta gaw, dai Hkawhkam jan a lak lai yu lakawn ai hpe hkrum ai ma rai nga nu ai, nga nna tsun hpaw dan lai wa sai. 1917 ning, September (13) ya shani gaw, (5) lang ngu na, Nu Maria Dan pru ai shani rai nga ai. Dai shaloi gaw, Lucia hpe, “October shata hta shi bai du sa na rai nna, ndai mabyin kaja wa teng ai re hpe masha n gun hte madun galaw na matu ga sadi hpyi lajin lai wa sai.” Dai shani hta, Canon Mannuel Nunes Formigao ngu ai wa mung, dai shara hta sa du shang lawm lai wa nu ai. Hpang jahtum (6) lang ngu na Nu Maria Dan pru ai nhtoi gaw, 1917 ning, October shata (13) ya shani rai nga ai. Dai shaloi na lang gaw, Nu Maria hku nna, “shing gyim masha ni shanhte a sak hkrung lam hpe galai shai ra sai, mara ni hpe hpyi nem tawng ban na aten rai sai ngu nna tsun sadi jaw lai wa sai hte, shing gyim masha ni mara hpe n galaw jat sana nga tim pyi gaw, Karai Kasang Wa, shingyim masha ni a matu dik hkra grai myit yawn taw chyalu rai nga sai re.” nga nna tsun lai wa sai rai nga ai.

Dai hta n-ga, shanhte hpe shani shagu Rosary matut hti nga na matu tsun let, dai shaloi masha marai (80,000) ram du hpawng nga ai ten, Marang kaba hpe jahkoi kau ya nna, jan a shing kang hpe jaw ya nhtawm me, mau hpa lamik kumla madun lai wa sai rai nga ai. Dai shana 7:00 PM hta , Canon Mannuel Nunes Formigao hku nna, shanhte marai masum hpe ga san ni bai san lai wa sai. Bai October shata (19) ya shani hta mung Francisco yen nau a nta hta shanhte marai masum hpe Wajau Jose Ferreira Lacerda kawn ga san san lai wa sai lam labau hta mu lu nga ai.1918 ning, October hta Tukkwi ana zinli hpan langai mi gaw, Europa Mungdan ting ngu na hta byin hkrum lai wa ai. Dai ana zinli hpe Jacinta shannau mung hkrum sha lai wa sai. Shaloi Jacinta gaw, Lucia hpe, anhte a Hkawhkam Jan gaw, Franciso hpe sa woi la na ra ai ngu tsun dan wu ai. Jacinta hkum nan mung, tsi rung shara lahkawng de sa lung ra mat ai.

Ndai zawn Jacinta gaw, Ourem na, Vila Nova ngu ai tsi rung de htawt nna tsi tsi hkam la lai wa sai. Ya na zawn, machyi ai majaw, Lucia hte kaga ga garan da ai hpe shi grai nra sharawng lai wa sai raitim, shi a machyi makaw tsin yam lam ni hpe Madu hta hkam sharang ap nawng ai re ngu myit awai la lai wa sai. Dai tsi rung hta shata (2) tsi tsi hkamla tim, tsamai wa ai lam nnga ai majaw, dum nta de bai nhtang wa mat ra sai. Shaloi, ginwang up Jau mung, yupra ntsa kaw hkringsa let kyu hpyi nga na matu hpaji jaw lai wa ai hte maren, kade mi nkam tim, rawt nna shanhte hpe ga shaga lai wa ai, nga nna labau hta tsun da nga ai. Dai hpang, Jacinta hpe Lisbon de tsi tsi na matu woi sa manu ai. Raitim, dai shara du yang she matsan jahkrai ma hpa rai mat ai, hpa majaw nga yang, dai tsi rung hta e, yup-ku nman mat ai majaw rai nga ai. Dai zawn re ai masa hta raitim, Jacinta gaw, grai pyaw ai, hpa majaw nga yang, shani shagu Madu a Chyoi Pra Hkum hpe hkam la lu nga ai majaw rai nga ai. 1920 ning, Feb praw (2) ya shani hta, hpang jahtum Estfania Tsi Rung de sa nna tsi tsi hkam la lai wa sai. Dai shara hta shi grai npyaw ai hte shingtai garen lam ni hpe hkam sha lai wa nu ai. Feb (10) ya shani hta, shi a garep nra lahkawng hpe shaw kau ra mat nu ai. Gade machyi kaba hkrum tim apu angun ai lam n nga hkam sharang nga nu ai.

Jacinta gaw, dai kaw lit ang ai hpawmi langai hpe, Hkawhkam jan gaw ngai hpe sa dan pru ai hte kade nna ai ten ngai hpe sa woi la na re lam tsun dan nu ai. Bai ngai a wunma mung mai mat sana re da, nga nna tsun dan nu ai. shingrai, Feb (20) ya shana maga de, hpang jahtum namman sau chya Sacramentu hpe hkam la nu ai. Wajau kaw mara raw ai shaloi, Wajau ngai hpe hpotde Chyoi Pra hkum hpe bai la sa wa ya rit yaw ngu htet tsun da ai raitim, dai shana jang, Madu hta yup pyaw mat wa sai rai nga ai. Shi a makoi mayang shani, Di-u hpe hpaw yu ai shaloi yawng mau mat ma ai da. dai gaw, Jacita a moi mang, asak hkrung taw ai zawn re ai nsam hte rai taw nga ai majaw rai nga ai. Shi a machyi makaw wunma ni hpe grai manam hawm ai nampan sama hte galai mat wa sai rai nga ai. Ndai zawn, shi nnga mat ai (15) ning ram na ai hpang, 1935 ning, September (12) ya shani, Shi a Lupwa hpe bai hpaw yu yang, nhten n-yat ai nan nan sha rai taw nga ai hpe mu lu ma ai. Jacinta a hkum tsawp moi mang hpe shi a kahpu Francisco hte rau, Fatima na Basilica Nawku Htingnu kaw e lup makoi da ma ai. “Ndai Francisco hte Jacinta yen nau a hkum tsawp moi mang gaw, shanhte hpe Nu Maria dan pru dan lai wa sai ngu ai lam, anhte hpe galoi mung  shadum ya nga ai” nga nna ka shakap da nga ai. Jacinta hte shi a Kahpu Francisco hpe San Pra ai Wa Sarabyin Yawhan Paulu (2) hkum nan Alu ai masha yen hku nna, Portugal Munggan, Fatima, Nu maria dan Pru ai shara na, Basilica of Our Laday of The Rosary ngu ai, Rosary a Hkawhkam Jan Nawku Htingnu hta e, tang da lai wa sai rai nga ai. Bai 2017 ning, May (13) ya shani, Wa Sarabyin Francis Hku nna, mi alu ai masha tang da lai wa sai, Nawku htingnu kaw sha, Sanpra ai masha yen hku nna, tang da lai wa sai. Shannau a Poi Nhtoi hpe gaw, February (20) shani ngu, Nawku hpung kawn masat da ya sai rai nga ai.

Nuwa Hpunau ni, anhte na la lu sai, San Pra ai Jacinta gaw, ma sha naw raitim, Karai Kasang Wa hpe tsawra hkungga manu shadan ai, Nu Maria hpe hkrit hkungga manu shadan ai lam ni mau hpa rai nga ai. Shi a machyi makaw hkamsha ai lam ni hpe mung, aput a ngun nnga ai sha, Madu hta ap nawng ai lam re ngu myit la nna, hkam sharang lai wa sai lam ni gaw, anhte a matu n gun la hpa rai nga ga ai. Dai majaw, anhte a sak prat hkrun lam hta mung, Karai Kasang Wa anhte hpe hpa tsun taw nga ai, hpa galaw shangun nga ai ngu ai lam ni hpe, Jacinta zawn, myit hpe azim sha rai let, sak hkrung hkawmsa lu hkra shakut sa wa ga ngu, n gun jaw let hpyi shawn da ai lamang hpe ndai kaw naw jahkring sai rai.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.