Ely Mare na San Pra ai Ermenilda a Poi Nhtoi (February 13)​ 13 February 2023

Ely Mare na San Pra ai Ermenilda a Poi Nhtoi (February 13)​

          San Pra ai Ermenilda gaw, hkyik hkam ai hkawhkam hkaw kaw na rai nga ai. San Pra ai Ermenilda gaw, Mungkan a hkyik hkam lam a malai, Madu a hpang hkan ai amu hpe madaw shi lata la lai wa sai rai nga ai. Shi gaw, Kenty ginwang na, English Hkawhkam a kasha mung rai nga ai. Shi hkum nan gaw, England Mungdan, ka-ang kaw na, Mersia Hkawhkam Wulfhere a madu jan rai nga ai. Shi a akyu hpyi shaja ai, makam masham myit grai rawng ai lam ni a majaw, tara maigan masha rai nga ai, shi a ning rum ning tau wa gaw, Nawku Hpung de gale shang wa nu ai. Mungchying sha ni hpe Karai Ksang Wa hpang de, gayin wa lu hkra shi a ning rum ning tau wa hpe hpaji jaw ya sai.

San Pra ai Ermenilda yan la gaw, kashu kasha marai (2) lu ma ai. Werbuga gaw, Mama tai nna, San Pra ai masha tai wa sai. Coenrad gaw, A.D (704 kawn 709) ning laman, Mersia ginwang na hkawhkam tai wa nhtawm, hpang daw  na shi a sak hkrung aten ni hpe Roma mare kaw na Jau Jawng kaw nga shakre kau lai wa sai.

Madu Wa n nga mat ai hpang, San Pra ai Ermenilda gaw, Mama tai mat nhtawm, shi a Kanu Sexburga hpaw hpang da ya ai, Minster In Sheppey kaw lit hkam tai wa sai. Kanu n nga mat ai hpang, shi a kamoi San Pra ai Etherlreda hpaw hpang da ai, Ely Mare na, Mama Jawng kaw Mama Kaba lit shatsam ai hpe hkrum sai. Shi a kasha jan, Welburga mung Dai Ely jawng kaw sha Mama tai mat nu ai.

Dai zawn rai nna, Sasana magam hpe gun hpai nga yang, A.D (703) ning, San Pra ai Ermenilda gaw, Madu hta yup pyaw ban sa wa sai rai nga ai.

San Pra ai Ermenilda n nga mat ai hpang, Nawku hpung hpe shi hpe San Pra ai Masha dang dat let, Shi a Poi Nhtoi hpe mung, February shata (13) ya shani ngu masat shagrau dat ya sai rai nga ai.  

 Daini Nawku hpung kawn, San Pra ai Ermenilda a Poi Nhtoi hpe galaw nga ai aten hta, anhte a Prat hta mung, tinang lu da sai makam masham hpe, tinang dum nta, makau grup yin, htingbu htingbyen ni hpe bai gam garan ya lu ai ni, nhtoi tai ya lu ai ni byin tai lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)