Cupertino Mare na San Pra ai Joseph a Poi Nhtoi (September 18) 18 September 2023

Cupertino Mare na San Pra ai Joseph a Poi Nhtoi (September 18)

Karai Kasang kawn hpat wat kaw tsap nga lu ai shaman chyeju jaw ya ai, n law n la re ai masha ni kaw, San Pra ai Joseph mung langai mi rai nga ai. Shi gaw, Naples mare na, Nardo Saradaw ginwang kaw, lai wa sai 1603 ning, June shata (17) ya shani hta shangai chyinghkai wa ai.

Kaji ai aten hta Cupertino mare kaw shang gumhpraw loi li hte sha, shagrit shanem let nga kaba wa ai. Franciscan Friars Minor Conventual Wuhpawng kaw jau tai wa sai. Shi gaw, Nu Maria hpe shi galaw ai amu ni yawng hte seng nna kam shamyet let galaw ai; kaga masha ni hpe mung Nu Maria hpe hkungga let kamhpa myit rawng na matu hkaw matsun ya sai.

Jau Joseph gaw, Wenyi lam hte seng nna lama ma tsun shagu, shi gaw hpat wat kaw tsap wa wa re ai. Missa Hkungga nawng jau ai shaloi, shing n rai Hkrismat Mahkawn “Carlos” hkawn ai shaloi hpat wat kaw akyu hpyi let noi goi wat taw taw rai nga ai. Kalang mi, ga kaw na Pe (36) tsaw ai kaw hpat wat tsap pru wa ai.

Jau Joseph a shiga na lu ai majaw, masha wunawng kaba, shi kaw mara raw na matu hpaji sa hpyi la ma ai; masha law law mung myit malai lu nna makam masham de bai gale shang wa ma ai. Shi a prat tup agung alau magup, chyam yu baw amyu shagu mung hkrum sha lai wa sai lam, shi a labau hta ka matsing da nga ai.

San Pra ai Jau Joseph gaw, 1663 ning, September shata (18) ya shani, shi a asak (60) ning hta, Madu kaw yup pyaw ban sa mat wa sai rai nga ai.

Shi n nga mat ai hpang, 1753 ning, February shata (24) ya shani hta, dai aten na, Wa Sarabyin Benedict (14) kawn, shi hpe A Lu ai Masha ngu masat shagrau dat ya sai rai nga ai.

Dai hpang, 1767 ning, July shata (16) ya shani hta gaw, dai aten na Wa Sarabyin Clement (13) kawn, shi hpe San Pra ai Masha dang dat let, Shi a Poi Nhtoi hpe mung, September shata (18) ya shani ngu masat dat ya sai rai nga ai.

San Pra ai Jau Joseph gaw, “Nbung lam hku nna bu hkawm ai masha ni hte San Poi htai na matu hkyen lajang nga ai Jawngma ni a kamhpa mai ai San Pra ai masha” He is the patron of air travelers and students preparing for exams. ngu nna masat shagrau hkrum ai wa mung rai nga ai.

Daini Nawku Hpung gaw, Cupertino Mare na San Pra ai Joseph a Poi Nhtoi hpe galaw nga ga ai aten, anhte a prat hta mung, Karai Kasang Wa jaw da ya sai, anhte hta nga ai lak lai ai shaman chyeju ni hpe jai lang nna, yawng a matu, akyu rawng manu dan ai ni byin tai nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

Add new comment

5 + 12 =