Cupertino Mare na San Pra ai Joseph a Poi Nhtoi (September 18)

Karai Kasang e hpat wat kaw tsap nga lu ai shaman chyeju jaw ya ai, n law n la re ai masha ni kaw, San Pra ai Joseph mung langai mi rai nga ai. Shi gaw, Naples mare na, Nardo Saradaw ginwang kaw, lai wa sai 1603 ning, July shata (17) ya shani hta shangai chyinghkai wa ai.

Kaji ai aten hta Cupertino mare kaw shang gumhpraw loi li hte sha, shagrit shanem let nga kaba wa ai. Franciscan Friars Minor Conventual Wuhpawng kaw jau tai wa ai. Shi gaw, Nu Maria hpe shi galaw ai amu ni yawng hte seng nna kam shamyet let galaw ai; kaga masha ni hpe shi galaw ai amu ni yawng hte seng nna, kam shamyet let galaw ai; kaga masha ni hpe mung Nu Maria hpe hkungga let kamhpa myit rawng na matu hkaw matsun ya ai.

Wenyi lam hte seng nna lama ma tsun shagu, shi gaw hpat wat kaw tsap wa wa re ai. Missa Hkungga nawng jau ai shaloi, shing n rai Hkrismat Mahkawn “Carlos” mahkawn ai shaloi hpat wat kaw akyu hpyi let noi goi wat taw taw rai nga ai. Kalang mi, ga kaw na Pe (36) tsaw ai kaw hpat wat tsap pru wa ai.

Shi a shiga na lu ai majaw, masha wunawng shi kaw mara raw na matu hpaji sa hpyi la ma ai; masha law law mung myit malai lu nna makam masham de bai gale shang wa ma ai. Shi a prat tup agung alau magup, chyam yu baw amyu shagu mung hkrum sha lai wa ai.

San Pra ai Joseph gaw, 1663 ning, September shata (18) ya shani, Madu hta yup pyaw ban sa mat wa sai rai nga ai.

San Pra ai Joseph gaw, “Nbung lam hku nna bu hkawm ai masha ni hte San Poi htai na matu hkyen lajang nga ai Jawngma ni a kamhpa mai ai San Pra ai masha” He is the patron of air travelers and students preparing for exams. ngu nna masat shagrau hkrum ai wa mung rai nga ai.

Shi hpe Wa Sarabyin Clement (XIII) gaw, 1767 ning hta, san pra ai masha masat dang dat nna, shi a poi nhtoi hpe September shata (18) ya shani masat shagrit dat sai rai nga ai.  

Daini Cupertino Mare na San Pra ai Joseph a poi nhtoi hpe galaw nga ga ai aten, anhte a prat hta mung, lak lai ai shaman chyeju Karai Wa jaw ya rit ga matu, alak mi akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)