Cortona Mare na San Pra ai Margaret a Poi Nhtoi (February 22) 22 February 2023

Cortona Mare na San Pra ai Margaret a Poi Nhtoi (February 22)

          San Pra ai Margaret gaw, shut hpyit mara galaw ai kaw nna myit malai lu wa ai hte seng nna, kaja dik ai kasi kamang rai nga ai. Shi gaw, mara galaw nna nga lai wa sai ten ni hpe, shingdu gayin tawn kau da nhtawm, ngam nga ai (29) ning tup tara shadik nna sak hkrung nga lai wa sai.

San Pra ai Margaret gaw, lai wa sai 1247 ning hta Italy Mungdan, Loviana mare kaw e shangai wa sai rai nga ai. Shi a asak (7) sha naw rai yang Kanu n nga mat sai. Hpang kanu gaw, shi hpe yu lakawn ai lam n nga ai. Kawa mung dinghku ting a matu, amu magam shakut ra ai majaw Margaret hpe aten n lu jaw wu ai. Shi hpe lam kaja matsun ya na masha n nga ai majaw, Margaret gaw, asak grai naw kajai ai aten la kasha langai mi hte nta kawn hprawng mat wa ai. Dai wa gaw, (9) ning na ai shaloi kasha langai mi hte rai Margaret hpe kabai kau da wu ai. Dai zawn kabai kau da hkrum ai majaw, Margaret gaw, shawoi na hta grau n shawp ai mara ni galaw nna nga mat nu ai.

Raitimung, Cortona mare kaw na Friars Minor Tawra Jau langai mi Margaret hpe lam bai shading sharai ya sai. Dai Jau sharin shadum ai majaw, Margaret gaw n shawp ai mara ni hpe tsep kawp tawn da sai. Shi a myit hpe myit yawn myit malai kaba hte galai shai mat sanu ai. Shi gaw, kaga masha ni a akyu a matu, amu galaw hpang sai. Machyi ai ni, matsan mayan re ai ni hpe garum jaw ai amu galaw mat wa nu ai. Dai hpang, Third Order of St. Francis Mama Magam Gun Wuhpung de shang mat wa nna, shi a kasha mung, Franciscan Jau tai mat wa nu ai.

Machyi masha ni hpe San Pra ai Margaret alak mi rai nna galaw daw ai hpe mu ai shaloi, masha law law gaw shi hte rau ja gumhpraw hte hpawn bungli jawm galaw shajang ma ai. Shi gaw, Poverelle “Poor Ones” (Matsan ai ni) ngu ai shawa wuhpung langai mi hpaw hpang da sai. Bai nna, Cortona Mare kaw Tsirung langai mi hte “Confraternity of Our Laday of Mercy” ngu ai “Matsan dum ai Nu Maria a Shakut Sharang Hpung” ngu ai Magam gun wuhpung hpe mung gaw de hpang da sai.

San Pra ai Margaret gaw, sumsing mungdan kaw na shingra ni hpe mung law law lang mu yu ai. Madu Yesu kaw nna, shiga na lu ai shaman chyeju mung law law lang hkam la lu ai. Shi si na 1297 ning, February shata (22) ya shani hpe mung tau chye da lu ai akyu hpe mung hkam la lu nu ai. Shi gaw, Shut hpyit mara byin shangun ai lam hte seng nna grai shadum kau da nga ai. Shi a shadum jahprang ga ni a majaw, masha law law myit malai lu, lam kaja de bai n htang wa ma ai.

San Pra ai Margaret n nga mat ai hpang, 1728 ning, May shata (16) ya shani, dai aten na Wa Sarabyin Benedict (XIII)(13) kawn, shi hpe San Pra ai masha dang dat let, shi a Poi Nhtoi hpe mung, February shata (22) ya shani masat shagrau dat sai rai nga ai.

Daini Nawku Hpung gaw, San Pra ai Margaret a Poi Nhtoi hpe galaw nga ai hte maren, anhte marai hkum shagu mung, lama na anhte a prat hta shut hpyit mara ni galaw shut kau ai raitim, aten n hpang hkrat ai sha lawan ladan myit yawn myit malai let, Karai Kasang Wa hpang de bai gayin wa lu hkra shakut nga ga law.

By;
Sister Rose Angeline Maran Nang Doi (SFX)

RVA-Kachin Service (Myitkyina)