Cortona Mare na, San Pra ai Guy @ Vignotelli a Poi Nhtoi (June 12) 12 June 2023

Cortona Mare na, San Pra ai Guy @ Vignotelli a Poi Nhtoi (June 12)

San Pra ai Guy gaw, 1185 ning hta shangai chyinghkai wa ai rai nga ai. Shi a Ma Kaji prat ten na labau hpe gaw, nau n mu lu nga ai. Shi gaw, Cortona Mare kaw e, Assisi Mare na, San Pra ai Francis hte hkrum ai kawn myit galai shai mat ai rai nga ai. Shi lu ai Ja Sutgan ni hpe gam garan jaw kau ngut ai hpang Franciscan Tawra Jau tai mat wa nu ai.

Jau Guy gaw, hpaji machye machyang lam hte ga shaga lam hta grai ning tawn ai wa mung rai nga ai. Shi hte seng nna San Pra ai Francis Assisi gaw, Cortona mare de, shi bai du sa wa shagu grai shakawn ya nga ai. Shi a dai daw buga masha ni gaw, San Pra ai Jau Guy hte seng nna, lamik kumla law law mu ma ai; hka kata hkrat si ai num sha ma hpe asak bai jahkrung sharawt ya ai, Hku hku wa ai ten hta malu masha hpe shalaw ya ai zawn re ai Lamik kumla ni hpe San Pra ai Guy madun dan lai wa sai rai nga ai.

San Pra ai Jau Guy gaw, 1245 ning, shi a asak (60) ning hta Madu kaw yup pyaw ban sa mat wa sai rai nga ai. Shi nsa garai n hti yang, San Pra ai Francis Assisi gaw, shi hpe Sumsing Mungdan de woi lung na matu sa wa ai shingran hpe shi mu dat ai lam, shi a labau laika buk hta mu lu nga ai.

San Pra ai Jau Guy n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, June shata (12) ya shani ngu masat shagrau dat ya sai rai nga ai.

Daini Nawku Hpung gaw, Cortona Mare na, San Pra ai Guy @ Vignotelli a Poi Nhtoi hpe galaw nga ai aten hta, anhte Hpung Masha ni mung, tinang a prat hta Karai Kasang Wa a shaga la ai nsen hpe na dat ai hte rau aten n garawt taw ai sha, kalang lata hkan nang sa lu ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)