Cork Mare San Pra ai Finbar a Poi Nhtoi (September 25) 25 September 2022

Cork Mare San Pra ai Finbar a Poi Nhtoi (September 25)

Lochan mying ai San Pra ai Finbar gaw, A.D (550) ning daram hta, Ireland Mungdan, Bandon mare kaw e shangai chyinghkai wa ai rai nga ai. Shi a Kanu gaw, Irish tara rung kaw magam gun ai rai nhtawm, Kawa gaw sumla ka (Soi) shatsawm ai wa rai nga ai. Finbar ngu mying lu wa ai lam gaw, Shi a Jawngma prat hta shi lung wa ai Kilkenny mare, Kilmachahill Jawng na Tawra Jau ni gaw shi a kara hpraw ai majaw, Fionbarr (Baw Hpraw) nga nna mying hkawp hte shaga lai wa ma ai. Dai aten kaw nna, shi a mying hpe Finbar ngu shaga lang hpang wa ai re lam, shi a labau hta mu lu nga ai.

San Pra ai Finbar gaw, Dingda Ireland Mungdan de Kabu Gara Shiga hkaw shabra nna, Nawku jawng law law hpe mung gaw gap da ya lai wa sai. Shi a Wenyi hte masha ni a wenyi hkye hkrang la ai hkrum na matu, asim sha myit sumru akyu hpyi na matu nga nna, Gouganebarra Zinlawng hta tara shadik let sa nga ai. Dai hpang Loigh Eire shara kaw Jau jawng langai mi hpe gaw gap da sai. Dai jawng hpe Corcaghmer nga nna shamying ma ai, mying dai kaw na, ya lang taw nga ai Cork Ginwang (Country Cork) ngu nna bai shamying la ai rai nga ai.

Saradaw Finbar gaw, Sagurem kaja a bungli galaw shakut shaja ai, hkam sharang ai myit, san seng san pra ai myit jasat hte seng ai, kaja ai kasi ningli ni a majaw, dingda Ireland mungdan hta makam masham hte seng nna grai awng dang jat wa sai.

San Pra ai Saradaw Finbar gaw, Cork mare na shawng nnan na Saradaw tai wa sai mung rai nga ai. Dai majaw, shi hpe “Cork mare de hpang ai wa” Founder of Cork City, nga nna masat shagrau ma ai. San Pra ai Saradaw Finbar gaw, A.D (620) ning grup yin hta, Madu kaw yup pyaw ban sa mat wa sai rai nga ai.

Wa Saradaw Finbar n nga mat ai hpang, Nawku hpung kawn shi hpe San Pra ai Masha dang dat let, Shi a Poi Nhtoi hpe mung, shaning shagu September shata (25) ya shani ding yang galaw ya nga ai rai nga ai.

Daini nawku hpung kaw nna, San Pra ai Saradaw Finbar a Poi Nhtoi hpe galaw nga ga ai hte maren, anhte hpung masha ni mung, tinang lu da sai kabu gara shiga hpe, grai n lu shi ai hpunau ni hpang de htawn gam garan ya ai ni, byin tai nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)