Cordoba Mare na San Pra ai Eulogius a Poi Nhtoi (March 11) 11 March 2023

Cordoba Mare na San Pra ai Eulogius a Poi Nhtoi (March 11)

 

San Pra ai Eulogius gaw, Nawku Hpung makam masham a majaw, zingri zingrat hkrum ai aten hta sak hkrung nga lai wa ai rai nga ai. Shi a tara shakut ai, lusha gam ai, akyu hpyi shaja ai kasi ningli ni gaw, masha law law hpe makam masham myit shangang ya, n gun atsam shabyin ya sai.

San Pra ai Eulogius gaw, Spain Mungdan kaw na, Moors amyu sha ni a mare daju rai nga ai, Cordoba mare kaw shangai chyinghkai wa ai rai nga ai. Kanu yan kawa gaw, ahkang aya lu ai masha kaba ni rai nga ma ai. Shi jau tai wa ai hpang, Spain Mungdan kaw na mying kaba htum ai Hpung jawng kaw jawng up lit shatsam ya ai hkrum sai.

Makam masham hte seng nna zingri ai lam ni byin pru wa ai shaloi, masha law law gaw, shi hpe grai kam shamyet ma ai. Shi a Saradaw, Jau ni hte rau shi hpe htawng kaw rim bang kau ma ai. Raitimung, shi gaw, n hkring n sa ai sha makam masham lam sharin ya nga ai. Makam masham a majaw, asak hpe n lahpawt ai sha, n hkrit n tsang rai, tinang a asak hpe ap kau ai tara sakse ni a labau laika hpe ka da wu ai.

Bai nna, shi gaw makam masham a majaw, baw kahtam di kau hkrum ai hkawnsek Flora hte mary yan hte seng nna, “Exhortation to Maryrdom” mying ai “Makam Masham a majaw si hkam na matu shadut ai” ngu ai laika mung ka kau da sai rai nga ai. San Pra ai Flora hte Mary gaw, shan a baw kahtam daw kau hkrum ai shawng e shan a manang ni hpe “Manang ni e, nanhte a matu akyu hpyi ya sai yaw!” nga nna ga sadi tau tsun da ai mabyin gaw, shan sat hkrum ai hpang (6) ya hta teng sha byin wa sai.

Dai gaw, shan sat hkrum nna (6) ya ngu na nhtoi hta Eulogius hte shi a manang ni htawng kaw nna shapraw ai hkrum manu ai. Bai nna, kaga makam masham a majaw sat kau hkrum ai ni hte seng nna, “Memorial of the Saints” ngu ai “San Pra ai ni hpe Myit Dum Masat Dingsat” ngu ai laika mung shi ka da ai.

San Pra ai Eulogius mung, makam masham a majaw, sat kau hkrum sai. Shi a majaw, makam masham lu la nna, kanu kawa a dingbai dingna jaw ai kaw nna lawt lu na matu shi hpe kamhpa ai moors salang kaba a kasha jan hkawnsek Leocritia mung, makam masham de shang wa sai. Raitimung, Leocritia mung, sat kau ai hkrum nu ai.

A.D 859 ning, March shata (11) ya shani, San Pra ai Leocritia hpe sat kau na shawng mali ya hta, Eulogius gaw, Baw htau sat ai hkrum sai.

Shi n nga mat ai hpang, Nawku Hpung gaw, shi hpe e San Pra ai Masha ngu masat dang dat let, Shi a Poi Nhtoi hpe mung, March shata (11) ya shani masat shagrau dat ya sai rai nga ai.

Daini Córdoba Mare na, San Pra ai Eulogius a Poi Nhtoi hpe galaw nga ga ai aten, anhte a lu da sai makam masham hpe galoi mung, sadi dung kang ka let, jum manoi manat da lu hkra, galoi mung, akyu hpyi shakut let hkawmsa nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

 

 

 

Add new comment

1 + 1 =