Corbie Mare na San Pra ai Colette a Poi Nhtoi (March 6) 06 March 2023

Corbie Mare na San Pra ai Colette a Poi Nhtoi (March 6)

Corbie Mare na, San Pra ai Collete gaw, Coletine Poor Clares a Gram sharai wuhpung lakung rai nga ai, The Order of Poor Clare (grau nna, Poor Clare) ngu chye shajang ai Wuhpung hpe gaw de dat ai San Pra ai masha rai nga ai. Shi a Prat hta mau hpa lamit kumla ni law law a majaw, Dinghku hkum rai mayu ai ni, Dinghku hkum gawng li ai ni hte machyi ai ma ni lak san kam hpa shamyet shanat mai ai San Pra ai Masha ngu masat shagrau nga ga ai re.

San Pra ai Collete gaw, Pyin Thit Mungdan, Picardy na, Corbie ngu ai mare, Nicole Boellet (Boylet) ngu ai shara hta  lai wa sai, 1381 ning, January shata (13) ya shani shangai chyinghkai wa ai rai nga ai. Shi a labau ka Sara ni ka shalawm da ai hta, shi a Kanu yan Kawa gaw, San Nicolette hpang de akyu n hpyi ai aten du hkra, kashu kasha n mayat ma ai. Shi a Kanu Marguerite, asak (60) du ai shaloi gaw, Numsha ma langai lu wu ai. Shi gaw, San Pra ai Collete rai nga ai. Shi hpe kaji ai aten hta, kanu yan kawa gaw, Nicolette ngu mying hkawt shamying ai kawn, hpang jahtum na ga si rai nga ai, Colette ngu nna shakawn mying shaga mat ai re lam, labau hta ka matsing da nga ai.

Shi a Kanu yan Kawa gaw, 1399 ning hta n nga mat ai hpang, San Pra ai Colette gaw, Beguines kaw shang lawm ai raitim, shi a sak hkrung nga sa prat hta lak lai ai lam ni hpa n nga wa ai majaw, kun dinghku de na matu ning dang nyet kau ai Benedictine Yomaya Wuhpung de shang mat wa nu ai. Dai shara hta mung, shi myit dik myit pyaw lam n lu la wu ai.

1402 ning, September shata hta gaw, (Third Order of St.Francis) Wuhpung shang masha hku nna hkam la let, Nawku Jawng makau kaw nga ai Corbie Saradaw a lam matsun ai n pu kaw Tawra langai hku nna tara shadik let nga nga nu ai. Dai Wuhpung hta mung, (4) ning shang lawm shakut kau da nhtawm, shi hpe yup mang shing ran ni grai jaw ai hte maren, (Second order of St. Francis) Wuhpung hpe Matsan Jam jau hte Shadawn sharam let nga sa, jai lang ra na” nga nna bai gram sharai ya sai.

1406 ning hta gaw, Avigon na, Wa Sarabyin Benedict (XIII) hpang de bai gayin wa wu ai. Wa Sarabyin Benedict (XIII) mung, shi hpe Pyin Thit Mungdan a dingda maga Nice hta e hkap hkalum hkrum shaga nhtawm, shi hpe mung, Poor Clare de gayin shang mat na matu ahkang jaw wu ai.

Geneva a Countess hte maren, Franciscan a Tara hkaw Sara Henry de Beaume (Shi a Wenyi Lam Matsun Ya ai Wa) a garum ya ai hte maren, Geneva na, Beaune Saradaw ginwang hta magam bungli hpe galaw hpang nu ai. Shi gaw, dai shara hta jahkring mi ngam ta nu ai.

1410 ning hta gaw, Urbanist Poor Clare a tawn da na ri ri rai nga sai, Besancon hta e, shi a No (1) ngu na, Jau Jawng hpe hpaw dat ya sai rai nga ai. Shi a sak prat hkrung lam hta, Jau Jawng (18) hpe gram sharai gaw dap da lai wa sai. Bai nna, Jau ni hkan sa ra ai Rit kawp tara ni, Shi a Poor Clare Wuhpung a rit kawp tara hte Colettines ni hpe 1434 ning hta gyin shalat dat nna, amyu daw ai Hkring Mang Casale Mare na William kawn madi shadaw ya nhtawm, Wasarabyin Nicholas (V) kawn masat shagrin dat ya sai rai nga ai. Dai hpang 1448 ning hta, Wa Sarabyin Pius (II), 1482 ning hta Wa Sarabyin Sixtus (IV) kawn kahtap nna masat shagrin dat ya sai rai nga ai.

Ndai Sasana magam ni hpe grai rai shakut nga ai aten, San Pra ai Colette gaw, 1447 ning, March shata (6)ya shani, Ghent hta e, Madu kaw yup pyaw ban sa mat wa sai rai nga ai.

San Pra ai Collete n nga mat ai hpang, 1740 ning, January shata (23) ya shani, dai aten na Wa Sarabyin Clement (XII) kawn Shi hpe A Lu ai Masha hku nna shagrau dat ya sai rai nga ai.

Dai hpang 1807 ning, May shata (24) ya shani, dai aten hta, Wa Sarabyin Pius (VII) kawn Shi hpe San Pra ai masha dang dat let, Shi a Poi Nhtoi hpe mung, March shata (6) ya shani ngu masat shagrau dat ya sai rai nga ai.

Daini Nawku Hpung gaw, Corvie Mare na, San Pra ai Colette a Poi Nhtoi hpe galaw nga ai aten hta, anhte a sak prat hkrun lam ni hta mung, tinang a dum nta masha, wuhpung wuhpawng ni hta mai kaja ai kasi ningli jaw ya lu ai ni byin tai lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myityina)