Compiegne Mare na Makam Masham a Majaw Sat Kau Hkrum ai Alu ai Mama ni (July 17)

A.D 1789 ning hta Fransik Mung, rawt malan kabrawng “French Revolution:” byin wa ai. Dai Rawt Malan a shawa hpawng “Feneral Assembly: gaw, 1790 ning, October shata hta shawng galaw hpang let, masing jahkrat ai. Tawra Jau, Mama ni Sasana magam gun tai na ga sadi tawn ai masing hpe laja lana nan pat jahkring ya kau ma ai. “All monastic vows were suspended by the General Assembly” Ndai ga sadi tawn ai hpe tara n shang ai ngu let Taw ra Jau, Mama jawng na arung arai ni hpe zing la kau shangun ma ai.

Carmelite Mama marai (15) hte Yu Maya Mama (sh) Lay Sisters hpe Fransick hkawhkam a hkaw de woi la nna amu galaw shangun ma ai. Shanhte a ningbaw hpe St. Augustine Jawng na Mama Kaba Theresa hpe shatai ya ma ai.

Asuya a yaw shada ai hku n hkan ai sha, shawa de pru san a malai, Mama ni gaw hkawhkam hkaw kata kaw arau sha nga ma ai. Nnan daw de shanhte hpe Mama jawng ni kaw nna gawt shapraw kau nhtawm, yu maya masha ni zawn nga shangun ma ai. Rai timung, Mama ni gaw hpung masham gun ga sadi hpe dingyang hkan shatup let nga ma ai; shanhte hpe wuhpung mali rai garan kau ya ma ai. Mama ni gaw, Asuya hpe ga sadi dung nga na masing hpe tsep kawp n hkap la ma ai. Dai majaw, 1794 ning, June shata (22) ya shani shanhte hpe rim nna htawng sharawng kau ma ai.

Mama ni hpe mare daju Paris de htawt kau ma ai; aten tup n shawp n hkaja ai hku nna zingri jamjau jaw shatsang ma ai. July shata (17) ya shani, shanhte hpe tara agyi ni gaw, Nanhte hpe Kahtawlik Makam Masham hkap la ai majaw, zingri shamyit ai re.” nga nna tsun ma ai. Shanhte hpe sat shamyit na shara de woi sa wa ai lam ding yang, Mama ni gaw, “Salve Hkawhkam Jan” hte “O Chyoi Pra ai Wenyi Karai” nga ai mahkawn ni hpe matut manoi mahkawn let hkan sa wa manu ai. Kashin kamun hkam la ai ten na ga sadi hte Hpung magam gun ga sadi ding yang tsun let sa wa ma ai. Shanhte langai hpra gaw, htau sat hkrum na aten ri ri hta, “Mungdan shagu e, Karai Kasang hpe shakawn kungdawn mu law.” Nga nna mahkawn let si hkam mat wa manu ai.

Dai majaw, Makam masham a majaw, asak si hkrum lai mat wa sai, Compiegne mare na Mama ni a poi hpe shaning shagu July (17) ya shani myit dum galaw ya nga ai zawn, anhte hpung masha ni marai hkum shagu mung, tinang a makam masham a matu galoi mung sak se hkam nga ra na matu myit dum mai nga ga ai law.

By;

Sister Rose Angline Maran Nang Doi (SFX)

RVA-Kachin Service (Myitkyina)