Cologne Mare na, San Pra ai Engerlbert a Poi Nhtoi (November 7) 07 November 2023

Cologne Mare na, San Pra ai Engerlbert a Poi Nhtoi (November 7)

San Pra ai Engerlbert gaw, lai wa sai 1185 ning hta, Berg ginwang up du kaba, Lam shagu hta ra n rawng hkra lusu nna, aya kaba lu ai kanu yan kawa kawn shangai chyinghkai wa ai rai nga ai. Dai majaw, shi mung kanu kawa ni a shing kang a majaw, ra ai ahkang aya, ja sutgan lu mai ai wa rai nga ai. Raitimung, Shi gaw, Karai Kasang a matu hte Shi a mungdan kaw na mungchying sha ni a matu, amu galaw na myit daw dan tawn ai hte maren, ra n rawng hkra galaw gun hpai lai wa sai.

1215 ning hta, shi gaw, Cologne mare na, Saradaw Kaba aya dang da ai hpe hkrum wu ai. Shi hte seng ai lit ni hpe atsawm sha gun hpai ai, Jau ni a hkansa tara hpe gram let, shi a Jau ni hpe woi nga chye ai. Shi gaw, Hpung Masha ni hpe laika hpaji chye chyang wa na matu, shadut ai. Shi hkum nan mung, Hkawhkam a kasha hpe Laika sharin ya ai. Shi gaw, Mungdan uphkang ai Hkringmang Daju “Chief Minister” ahkang aya hpe mung shagrin masat da ya lai wa sai.

San Pra ai Engelbert galaw sa wa ai lam shagu hta, dingman ai tara “Justice” hpe madung tawn da ai. Shi a lawu lahta kanau Frederick gaw, Mama Magam Gun Wuhpung hte seng ai arung arai lit hkam rai nga ai. Dai wa gaw, shi lit la tawn ai Mama ni a arung arai n kau mi hpe lagu la ai lam dan leng nga ai. Dai majaw, Saradaw Engelbert gaw, shi hpe dai lit hkam aya kaw na jahkring kau wu ai. Dai majaw, shi hpe Frederick gaw, grai n ju n dawng mat ai hte sat na matu gyam lai wa sai.

1225 ning, November shata (7) ya shani, Frederick woi awn ai n hkru n kaja ai masha ni gaw, Saradaw Engelbert hpe hkrun lam kaw hkap lagyim rim la nhtawm, nhkyi hte galun sat kau ma ai.

Wa Saradaw Engelbert a hkum tsawp hpe 1226 ning, February shata (24) ya shani, Cologne Cathedral Nawku Htingnu de bai htawt makoi da ma ai.

Shi n nga mat ai hpang, Nawku Hpung gaw, shawoi na zawn aten galu jep sagawn ai lam ni n nga ai sha, kalang lata San Pra ai Masha dang dat let, Shi a Poi Nhtoi hpe mung, shi sat kau hkrum ai, November shata (7) ya shani ngu masat shagrau dat ya sai rai nga ai.

Daini Nawku Hpung gaw, Cologne Mare na, San Pra ai Engerlbert a Poi Nhtoi hpe galaw nga ai aten hta, anhte mung, Wa Saradaw Engerlbert zawn, teng man ai hpe hkungga manu shadan ai ni byin tai nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)