Cologne Mare na San Pra ai Bruno a Poi Nhtoi (October 6) 06 October 2023

Cologne Mare na San Pra ai Bruno a Poi Nhtoi (October 6)

San Pra ai Bruno gaw, 1030 ning hta Germany mungdan, Cologne mare kaw shangai chyinghkai wa ai rai nga ai. Carthusian Order ngu ai Carthusian Tawra Jau Wuhpung hpe gawde hpang da ai San Pra ai Masha wa mung rai nga ai. Jau tai ai hpang Rheims mare na, Saradaw a laika sharin jawng kaw laika sharin sara lit hpe (18) ning tup gun hpai lai wa yu ai. Shi sharin shalat dat ai jawngma ni kaw nna alak mi rai hpaji kung zet magrau grang ningtawn ai ni grai law hkra pru wa ma ai.

Bruno Shi chye ai hpaji a majaw, gumrawng myit ni hte agau alau ni kaw na lawt lu na matu Seche Fontaine ngu ai hka-hpawk nga ai maling kaw tara sa shadik let nga mat ai. Dai shara kaw Tawra Jau mamang ni hte rau galaw shut kau ai mara a dan hpe shatup ai hku nna akyu hpyi shaja ai hte jam jau jam hkau ni hpe hkam sharang let tara shaja nna nga lai wa ma ai.

Dai kaw nna pru shang yak la ai laja lana re ai Chartreuse mying ai nam malaing de htawt nga mat ma ai. Dai nam maling kaw, San Pra ai Bruno gaw, Carthusian Tawra Jau Wuhpung hpe gawde hpang dat sai rai nga ai. Bai nna, dai shara kaw Jau ni arau akyu hpyi na nta hte shanhte langai hpra nga na gawk ni sha galaw tawn ma ai. Amyu shayi ni gaw, dai shara de tsep kawp nmai sa na matu gin htim tawn da ma ai.

San Pra ai Bruno gaw, galoi mung mani sumsai re ai myi man hte nga chye ai. Shi gaw, 1101 ning, October shata (6) ya shani hta Italy Mungdan, Calabria mare kaw na Tawra jawng hta Madu kaw yup pyaw ban sa wa sai rai nga ai. Shi de hpang da ai Carthusian Tawra Jau Wuhpung hpe simsa ai shara kaw myit sumru nna tara shadik lu na matu, mai kaja dik ai kasi kamang ni nga ai majaw, shagrau sha-a ai hpe hkrum ma ai.

San Pra Bruno hpe 1514 ning, dai aten na Wa Sarabyin Leo (10) gaw, A Lu ai Masha hku nna masat dat sai rai nga ai.

Bai 1623 ning, February shata (17) ya shani hta gaw, dai aten na Wa Sarabyin Gregory (15) kawn, Shi hpe, San Pra ai Masha dang dat let, Shi  a Poi Nhtoi hpe October shata (6) ya shani ngu masat dat ya sai rai nga ai.

Daini Nawku hpung gaw, San Pra ai Bruno a Poi Nhtoi hpe myit dum galaw nga ga ai hte maren, Anhte mung, lai wa sai aten ni hta anhte shut hpyi kau sai lam ni yawng hpe, myit yawn myit malai let, simsa ai shara hta akyu hpyi htinglu htinglai la lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)