Cluny Mare na San Pra ai Odo a Poi Nhtoi (November 18)

San Pra ai Odo gaw, Nawku Hpung kata gram sharai ai amu ni hta shang lawm galaw ya lai wa sai rai nga ai.

Shi gaw, A.D 879 ning hta, Fransik mungdan, Le Mans mare kaw shangai chyinghkai wa ai rai nga ai. Shi naw kaji nga ai aten kaw nna, shi a manaw manang ni yawng gaw, lusu nga pyaw ai Hkristian hpung masha ni rai ma ai. Shi a asak (19) ning hta Tonsure “Kara Yau ai Aya: hpe hkam la lu nu ai. Tours mare kaw na, San Pra ai Martin a rung hta, tara je yang daw dan ai tara agyi lit magam mung gun hpai lai wa sai.

Dai Hpang, shi gaw, Baumre mare kaw na, Jau Tai jawng de shang mat wa nu ai. Shi Jau tai ai hpang, dai jawng kaw na Jau kaba lit dang da ai hpe hkrum sai. A.D 927 ning hta Cluny mare na, Jau kaba Berno nsa hti mat shaloi, shi a hkang galai lit shatsam ya ai hpe bai hkrum wu ai. Dai lit gun hpai nga ai aten hta, shi a gram lajang chye ai shaman chyeju atsam a shiga gaw, shara shagu de chyawm bra mat wa sai. Dai zawn re ai shaman chyeju atsam hpe mu lu nna, dai aten na, Wa Sarabyin Yawhan (XI) gaw, shi hpe lahta Fransik mungdaw hte Italy mungdan kaw na Jau jawng ni hpe gram sharai ai amu galaw na matu lit shatsam ya wu ai.

 

Shi gaw, dai mungdan hkan na mung up asuya ni e, Nawku hpung a Jau Jawng ni hpe tara n shang ai ladat hte zing la ai lam ni hpe mung gin htim jahkring kau ya lu nu ai. Bawngring bungli, gram lajang ai atsam lu la ai, San Pra ai Odo gaw, Roma mare de sa wa ai hkrun lam hta Tours mare du ai shaloi, A.D 942 ning, November shata (18) ya shani hta, Madu kaw yup pyaw ban sai mat wa sai rai nga ai.

Cluny mare na, San Pra ai Odo a labau kadun hpe hti hkaja la nna, anhte a prat hta mung, shading sharai ra nga ai lam ni hpe n hkrit n tsang shading sharai la let, mai kaja ai sak prat hkrun lam hte hkawmsa lu hkra shakut nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

Add new comment

5 + 5 =