Chyoipra ai Sin ai Lamu Kasa Ni a Poi Nhtoi (October 2)

Lamu kasa hpe Greek ga hte “Angelos” nga ma ai; lachyum gaw “Dat Kasa” ngu ai rai nga ai. Lamu kasa ni gaw, Karai Kasang e laksan nyan hpaji atsam marai jaw da hkrum ai wenyi ni rai nga ma ai. Shanhte gun hpai ai lit gaw, Karai Kasang a myit shadik ya na hte shing gyim masha ni hpe bausin makawp maga ya na matu rai nga ai.

Lamu kasa ni gaw hkum sai shan hte hpan da hkrum ai ni n rai ma ai; dai majaw, shanhte hpe aten ladaw, shara hte seng nna masat ya n lu ai; num la ngu ai mung n mai shamying ai. (Marku 13: 25)

Bai nna: “Madu Karai Kasang gaw, nang hpe lam shagu hta yu sin makawp maga ya nga na matu lamu kasa ni hpe lit shatsam da ya sai.” (Shakawn Kungdawn 9: 11) nga nna ka da nga ai.

Shing gyim masha shagu gaw, sin ai lamu kasa langai hpra lu ai hkrai rai nga ai; lamu kasa gaw, shing gyim masha hpe hkrit tsang hpa shagu kaw nna makawp maga ya nna, shi a madu Karai Kasang kaw akyu hpyi htinglu ya na matu rai nga ai lam Chyum Laika hta mu hti hkaja la lu nga ga ai re.

Madu Yesu gaw: “Ndai ma kaji ni kaw na kdai hpe mung nanhte n yu kaji mu ga. Hpa majaw nga yang, shanhte a lamu kasa ni gaw sumsing lamu ja mungdan kaw na Nye Wa a myiman hpe aten tup mu lu nga ai ni rai ma ai.” (Mahte 18: 10) nga nna tsun da nga ai. Ndai zawn sin ai lamu kasa ni nga ai lam Madu Yesu hkum nan dan dan leng leng madi shadaw let tsun shadum da nga ai.

Lamu kasa ni gaw, shing gyim masha ni a myit mang yaw shada ai lam ni, galaw sa wa ai amu bungli hte seng nna shading sharai, shadum matsun ya ma ai. Raitimung, shanhte gaw shing gyim masha shagu hpe Karai Kasang jaw da ai awm dawm shang lawt ahkaw ahkang hpe gaw n pat shingdang ya ma ai. Dai majaw, masha shagu gaw, tinang lu ai ahkaw ahkang hpe mung shagwi ai, jahkrit shama ai lam n galaw ma ai. Si mani di kai ladat hte garum jaw, shadum jahprang ya, lam woi shading sharai ya, makawp maga ya taw ai rai nga ai.

Daini Nawku hpung kaw nna, Chyoipra ai Sin ai Lamu Kasa Ni a Poi Nhtoi hpe galaw nga ga ai aten, anhte marai hkum shagu mung, anhte a matu Karai Kasang a shatsam da ya sai, Sin ai Lamu Kasa ni gaw, anhte hte arau rai nga ai ngu ai hpe galoi mung myit dum let, asak hkrung hkawmsa lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)