Chyoi Pra Ai Wudang Shagrau Poi Nthoi (September 14) 14 Sept 2023

Chyoi Pra Ai Wudang Shagrau Poi Nthoi (September 14)

Moi shawng de Wudang hpe ari dan hte sat shamyit ai a kumla, nga nna kam hkrat wa ma ai. Raitimung, Madu Yesu gaw Wudang hpe "Htani Htana Ngwi Pyaw Simsa ai Shara de Sa Wa ai Lakang" nga nna shagrau sharawt ya sai. Kasa Pawlu gaw "Wudang hta jen da hkrum ai Hkristu gaw Yuda ni a man e myit kataw shara, maigan amyu ni a man e angawk angak, rai nga ai. Raitimung, shaga lata la hkrum ai Yuda hte Heleni mashani a matu, Shi gaw Karai Kasang a atsam hte Karai Kasang a hpaji byeng-ya ngu ai, Hkristu nan rai nga ai.” (1 Kor 1: 23-24) nga nna Madu Yesu hkrm nan matsun da ya sai. Ndai Wudang Shagrau Poi gaw, A.D (629) ning hta Madu Yesu a Wudang hpe bai mu la ai mabyin hte mung seng nga ai.

Madu Yesu a hkum tsawp hpe nlung hta tawk ai lup kaw makoi mayang kau ma ai. Wudang hpe gaw Hkristian masha ni tam n mu lu hkra nga nna hkaraw de kabai bang kau nhtawn nlung hte aga hte kaput kau ma ai. A.D (326) ning hta Constantine hkawhkam a kanu, San Pra ai Helen gaw Madu Yesu a Wudang hpe makoi magap kabai tawn ai shara kaw nna bai mu la ai. Dai hpang San Pra ai Helen gaw Wudang hpe Yerusalem mare na Holy Sepulchre, "Chyoi Pra ai Lupwa" mying ai Nawku Jawng Kata kaw grai hkik hkam ai hku nna htawt shagrau tawn da ya lai wa sai.

A.D (614) ning hta Persia mungdang na hpyen hpung ni gaw Palestine mungdan hpe shang htim gasat nna chyoipra ai Wudang hpe mung shanhte a Persia mungdang de la mat wa ma ai. Raitimung, A.D (629) ning du ai shaloi Constantinople mare na Hkawhkam Imperor Heraclitus gaw, Persia munndang hpe bai htim gasat awng dang la nna Madu Yesu a Wudang hpe mung, Yerusalem mare de bai la wa ya lu sai.

Hkawhkam Heraclitus gaw, shi hkum nan Wudang hpe Yerusalem mare kata de hpai shang wa mayu nna, hpai shang wa yu ai Raitimung mare chyinghka du ai shaloi shawng de matut nna n lu shang mat ai!  Dai hpe mu nna hkawhkam a makau kaw hkawm nga ai Patriarch Zachary (snr) Zahkari mying ai Saradaw kaba gaw hkawhkam a hkik hkam la ai buhpun ni gaw, Hkristu Yesu a shagrit shanem dik ai nsam hte shai ai majaw re, nga nna shadum ya ai. Dai majaw Hkawhkam Heraclitus gaw saihtung hpun dagraw nhtawm hkyepdin n din ai sha Wudang hpe hpai nna shang wa ai shaloi she, Yerusalem mare kata de lu shang mat ai. Dai hpang hkawhkam wa gaw, shawng de tawn shagrau da ai shara kaw sha Wudang hpe bai tawn shagrau da lu mat ai.

Dai hte maren, daini mungkan mungdan shara shagu hta Chyoi Pra ai Wudang Shagrau Poi hpe galaw nga ga ai aten, anhte a myitru myitra nni nkri lam ni yawng hpe hpai la kau ya sai, Madu Yesu hpang de myit yawn myit malai ai hte ra nga ai akyu chyeju ni hpe, laksan hpyi la nga ga, mai byin ai rai yang, tinang a ni nawn ai Buga kaw nga ai Akyu Hpyi Wudang Bum de sa du let, akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)