Carmel Bum Ntsa Na Nu Maria (Sh) Our Lady of Mount Carmel (July 16)

Carmel Bum Ntsa Na Nu Maria gaw, Carmelite Tawra Jau wuhpung Magam gun ni a laksan kam shamyet ai Nu Maria, “Patroness of Carmelite Monks” rai nga ai. Ndai Bum gaw, Mediterranean Panglai de man yawng ai, grai tsawm ai shara rai nga ai. Carmel Bum a mying hpe la nhtawm, Tawra Jau Wuhpung a Mying hpe Carmelite Jau Wuhpung ngu shamying ai lam rai nga ai. Bum ndai hpe Myihtoi Eliya (850 BC) ten kaw nna, Chyoipra ai shara, Karai Kasang hpe sadi dung ai shara hku nna masat hkrat wa ai rai nga ai. Ndai Bum ntsa hta, Myithoi Eliya gaw, Isreal Amyu sha ni hpe shaga jahpawng la nhtawm, Baal hpara hta Karai Kasang she grau atsam rawng ai lam asan sha sakse madun ya lai wa sai.

Ndai Bum ntsa e, 1150 ning hta San Pra ai Berthold gaw, Nu Maria a makawp maga ai npu kaw Hpung magam gun sa wa na Carmelite Jau Wuhpung hpe de hpang dat sai rai nga ai. Ndai Jau Wuhpung a ritkawp tara gaw, grai ja ai; matsan mayan rai na, asim sha nga na hte shan n sha ai sha nga ra ma ai. Hkrusik Majan a hpang, San Pra ai Simon Stock gaw, Carmelite Jau Wuhpung hpe Gram lajang ya ai; shanhte hpe kasa amu grau manu hku nna gun hpai sa wa lu na matu, “Garum hpyi hkawm ai Tawra Jau Ni” (Mendican Friars) shatai kau ai.

Tsaban (16) du ai shaloi gaw, Carmelite Sasana Magam gun Wuhpung hpe Calced Carmelite Wuhpung hte Disalced Carmelite Wuhpung ngu nna bai hpaw jat dat ma ai. Calced Carmelite ni gaw, San Pra ai Simon Stock a tara grau laja ai hpe hkam nna, Discalced Carmelite ni gaw, St.John of the Cross bai gram ya ai tara hkrang hpe hkan ma ai. Ra kadawn ai majaw, bai hpaw jat ai Carmelite wuhpung ni kaw e, Tsaban (16) hta Avila mare na San Pra ai Teresa hpaw hpang ai, Discalced Carmelite ni mying grau dan dawng wa ai. Carmelite ni gaw, Nu Maria sad an pru dan ai majaw, Carmel Bum na Sakapula” hpe grai manu shadan hkungga kam shamyet ma ai.

Nu Maria a gaw, England mungdan, Cambridge mare na Carmelite wuhpung a ning rai nga ai, San Pra ai Simon Stock kaw 1251 ning, July shata (16) ya shani sa dan pru dan ai. Nu Maria gaw, San Pra ai Simon Stock hpe Skapula amang jaw nna, dai hpe gali ai ni gaw, laksan makawp maga hkrum na hte lamu ja mungdan kaw na shaman chyeju law law lu na re, nga nna ga sadi mung jaw da wu ai. Ndai mabyin a hpang Dugali Masat (Skapula) hpe hkungga kamhpa shamyet ai masing gaw, Uropa dan ting hta chyam bra mat wa sai rai nga ai.

Daini nawku hpung kaw nna, Carmel Bum ntsa na Nu Maria a Poi hpe myit dum galaw nga ai zawn, ya ten Mungkan mungdan shara shagu hta Karai Magam gun hpai nga ai, Carmelite Wuhpung na Wa Jau ni, Mama ni yawng a matu mung, laksan myit dum akyu hpyi ya ai nhtoi mung rai nga ai.

By;

Sister Rose Angeline Maran Nang Doi (SFX)

RVA-Kachin Service (Myitkyina)

Add new comment

17 + 0 =