Capistrano Mare na San Pra ai Yawhan a Poi Nhtoi (October 23)

Capistrano Mare na San Pra ai Yawhan gaw, Italy Mungdan, Capistrano mare hta 1938 ning, June shata (24) ya shani shangai chying hkai wa ai rai nga ai.

Shi gaw, asak kaba wa ai hte Franciscan Jau Wuhpung kaw hpaji sharin hkaja la let, ga sahga ai lam hta grai ning tawn ai wa tai wa sai. Shi gaw, Hkansa rit kawp tara (Law) hte seng ai hpaji lam yan hta Hpaji Ninghkring (Doctor) janmau lu ai wa mung rai nga ai.

1416 ning hta Perugia hte Malatestas ginwang mayan lapran majan byin pru wa sai. Ndai majan laman hta shi hpe sadi n-dung ai ni maw dat ai majaw, htawng kaw dut mat wa nu ai.

Dai htawng kaw na, bai pru wa ai hpang lani mi hta, shi gaw, laiw as ai aten hta shi galaw shut hpyit kau sai mara ni yawng hpe myit yawn myit malai lu nna, dai mara ni yawng hpe maisau pa hta ka nhtawm, dai maisau ni hpe mung shi a palawng hta shakap lang rai nna, Franciscan Minor Tawra Jau wuhpung de shang na matu ahkang sa hpyi wu ai. Kaja nga jang, dai aten gaw shi a asak (30) ning du sai re, raitimung Chyoi Pra Hkum hkam na ahkang grai nlu shi wu ai.

Dai Jau tai jawng hpe woi awn lit la nga ai Jau gaw, Yawhan hpe myit chyawm ai hte hpawn ga ja ja nga nna tsun sharin shaga yu ai, raitimung shi gaw shagrit shanem ai myit hte Jau a sharin matsun ni hpe atsawm hkap la hkan sa nga nu ai. Dai majaw, shi hpe 1420 ning hta, Jau tai Sakramentu hkam ya masai. Dai hpang, Jau Yawhan gaw, Italy, Germany hte Hungary mung hkan grai awng dang ai hku nna, tara hkaw hkawm mat wa nu ai.

1456 ning hta Turkey mungdan na, Turks amyu sha ni gaw, Belgrade mare hpe zing la ngut ai hpang Uropa dan ting hpe zing la kau na matu masing jahkrat ma ai. Shaloi, dai aten na Sarabyin gaw, dai Turks tai hpyen ni hpe hpyen ladat hte ninghkap na matu, Jau Yawhan hpe masha kahkyin shangun wu ai. Jau Yawhan a magrau grang ai myit jasat a majaw, Hkristian marai 70,000 hpe lu kahkyin zinlum la nna, taihpyen ni hpe awng dang kau lu sai. Ndai awng padang poi galaw nna, shata (3) na ai hpang, October shata (23) ya shani, shi a asak (70) ning hta, machyi kaba hkrum let, Hungary Mungdan na, Ilok ngu ai mare hta e, Madu kaw yup pyaw ban sa mat wa sai rai nga ai.

Shi a Poi Nhtoi hpe October shata (23) ya shani hta galaw ya nga ai re. San Yawhan a labau hpe hti hkaja yu ai shaloi, anhte a prat hta mung, n jaw n teng ai hku nna tinang hpe roi rip dang sha wa ai lam ni hpe gaw, gwi gwi rip rip hte hparan lajang ra ai lam hpe mu lu nga ga ai re. Dai majaw, anhte a prat hta mung, Karai Kasang Wa anhte hpe gara hku nna jai lang akyu jashawn mayu nga ai kun ngu ai lam hpe galoi mung myit sumru let, sak hkrung hkawmsa lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)