Canterbury Mare na San Pra ai Augustine a Poi Nhtoi (May 28) 28 May 2023

online image

Canterbury Mare na San Pra ai Augustine a Poi Nhtoi (May 28)

San Pra ai Augustine gaw, Canterbury mare a shawng ning nan na Saradaw rai nna, Tsaban (6) daram hta nga lai wa sai rai nga ai. Shi gaw, Roma Mare na, San Pra ai Andrew Tawra Jau jawng kaw na rai nga ai. San Pra ai Sarabyin Gregory the Great gaw, Jau Augustine hte manang (30) hpe England mung kaw na Ja Chyum Mungga hkaw shabra na matu, A.D (596) ning hta lit shatsam shangun dat sai.

San Pra ai Saradaw Augustine hte Nawku hpung masha ni gaw, England Mungdan, Kent Mare de du mat wa ma ai. Shanhte hpe English Hkawhkam Ethelbert gaw, Hkawhkam hkaw kata kaw n re ai sha pa layang na hpun shingnip kaw hkap tau la wu ai. Dai gaw, shanhte hpe lakhpoi mi gun kun ngu tsang nna, rai nga ai, pa layang agang chyalang re ai kaw lakhpoi ni atsam n rawng ai ngu kam nna hpun shingnip kaw hkap tau la ai rai nga ai.

Dai hpang hkawhkam gaw, Saradaw Augustine ni a myit kaja ai hpe chye lu nna, Canterbury mare kaw lamu ga dachyawk mi jaw nna, shanhte ra ai shara shagu hkan Ja Chyum Mungga hkaw lu ai ahkaw ahkang mung jaw yaw u ai. Masha law law gaw, makam masham hpe kabu gara hkap la ma ai. Hkawhkam Ethelbert hkum nan mung, A.D (597) ning, Chyoi Pra ai Wenyi Yu Hkrat Wa ai Poi Laban (Pentecost) Shani Kashin Kamun Sacramentu hpe hkam la nu ai.

Saradaw Augustine hte Hpung Magam Gun, Hpung Masha ni gaw, Ginjaw Roma mare kaba kaw na Wa Sarabyin hte mung ding yang matut mahkai let nga ma ai. Wa Sarabyin a “Tsaw ai de lung mayu ai wa gaw, lahkam langai hpang langai lung ra ai, n mai shing tawt ai.” nga ai matsun ga hpe ayan hkan shatup ma ai. Shanhte gaw, Tara maigan ni a makam masham hkap la timung, shawng de na shanhte a tara maigan ni a Nawku Shara ni hpe n jahten kau ai sha dai shara ni hpe Hkristian Nawku Shara shatai na matu akyu hpyi nna shaman la ma ai.

Dai shara hkan na hkansa htung tara ni hpe mung, byin mai ai made hkan ya ai hte tara maigan poi ni hpe mung San Pra ai ni a Poi de galai shamying la ma ai. Saradaw Augustine gaw, Canterbury mare kaw Kasa Petru yan Pawlu a mying hte Nawku Jawng Kaba hpe mung gaw gap da lai wa sai. England Mungdan kaw na Saradaw ginwang kaga ni mung masat hpang da ya sai.

Dai aten kaw na, shi hpe England Mungdan a Kasa “Apostle of England” ngu nna masat shagrau dat sai rai nga ai.  

San Pra ai Saradaw Augustine gaw, A.D (604) ning, May shata (26) ya shani hta Madu kaw yup pyaw ban sa mat wa sai rai nga ai.

Shi n nga mat ai hpang, Nawku Hpung gaw, shi hpe San Pra ai Masha dang dat let, Shi a Poi Nhtoi hpe mung, May shata (28) ya shani masat shagrau dat ya sai rai nga ai.

Daini Nawku Hpung gaw, Canterbury Mare na San Pra ai Augustine a Poi Nhtoi hpe galaw nga ai aten hta, anhte mung San Pra ai Augustine zawn tinang a makau grup yin hkan na ni hpe, Madu a Kabu Gara Mungga hkawn tsun shachyam shabra lu ai ni byin tai lu hkra shakut sa wa ga law.

 

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

 

 

 

Add new comment

7 + 4 =