Canterbury Mare na San Pra ai Anselm a Poi Nhtoi (April 21) 21 April 2023

Canterbury Mare na San Pra ai Anselm a Poi Nhtoi (April 21)

San Pra ai Anselm gaw, lai wa sai 1033 ning hta, Italy Mungdan, Aosta Mare kaw shangai chyinghkai wa ai rai nga ai. Shi a Kanu yan Kawa gaw, lusu nga pyaw ahkaw ahkang kaba lu ai ni rai ma ai. Shi a asak (27) ning du ai shaloi, Normandy ginwang, Bec mare kaw na Benedictine Tawra Jau Jawng de shang mat wa nu ai.

Dai hpang masum ning na ai shaloi, shi hpe Caen Jawng kaw na Tawra Jau kaba lit shatsam ya ma ai; shaloi shi a asak grai naw kaji nga ai majaw, dai jawng kaw na Tawra Jau ni a lapran shi hte seng nna loi mi garu wa ma ai. Raitimung, kade nna yang, shi a atsam marai, masha ni a ntsa matsan chye dum ai myit hte masha ni gara hku nna hkamsha nga ai hpe tau chye ya ai myit ni a majaw, Tawra Jau ni yawng, shi hpe kabau gara hkap madi shadaw la ma ai.

Shi a hpaji sharin ai ladat gaw, madang grai tsaw ai hpe mu lu ai. Kalang mi na, shi a manang Jau langai mi gaw, jawngma ni hpe shi sharin ai ladat tang n du ai majaw, ka-un nga ai hpe mu nna: “Wa Jau e, na a sun kaw hpun hkai da nhtawm dai hpe lagung shagu gyit hkang da yang gaw, hpun dai n kaba wa lu ai; lakung kakying ni gara hku mung ntu kra wa lu ai. Ya na a jawngma ni hpe akre are, gayet jahkrit shama nga yang gaw, shanhte myit gara hku mung n pyaw lu ai; shanhte hpe awm dawm ahkaw ahkang jaw ra ai.” ngu nna shadum ga tsun wu ai.

San Pra ai Anselm gaw, grai myit sumru yu chye ai, Karai Kasang a hpaji lam hta hpaji ning hkring (Theologian), machye machyang kung zet ai ni a kawa langai mi mung rai nga ai. “Monologue” ngu ai shi a laika hta shi gaw, Karai Kasang gaw madang tsaw dik ai wa re (Highest Being) ngu let, Karai Kasang a atsam shingkang lam hkai dan da nga ai. “Prologue” ngu ai laika hta gaw, Karai Kasang nga ai lam (God’s Existence) hkrang jaw dik ai hku nna sharin matsun dan nga ai.

1093 ning hta Canterbury mare kaw na Saradaw kaba Langranc a shara hta hkang galai lit la ya na matu shaga la hkrum wu ai. Dai aten gaw, Nawku Hpung a awm dawm ahkaw ahkang hte seng nna hkawhkam ni grai shang ginjang nang ai aten mung re; Saradaw Kaba Anselm mung law law lang dai shara kaw nna gawt shapraw kau ai hkrum nu ai. 1106 ning hta, Canterbury mare de bai du wa ai shaloi, ginwang kata na masha ni gaw, Saradaw hpe kabu gara dik let hkap hkalum la lai wa ma ai.

Saradaw Anselm gaw, 1109 ning, April shata (21) ya shani, shi a asak (76) ning hta Madu kaw yup pyaw ban sa mat wa sai rai nga ai.

Shi nga mat ai hpang, 1163 ning hta, dai aten na Wa Sarabyin Alexander (III) gaw, shi hpe San Pra ai masha dang dat let, shi a Poi Nhtoi hpe mung, April shata (21) ya shani masat shagrau dat ya sai rai nga ai.

Daini Nawku Hpung gaw, San Pra ai Saradaw Anselm a Poi Nhtoi hpe galaw nga ga ai aten hta, anhte marai hkum shagu mung, tinang shang lawm nga ai Nawku Hpung hta, shatsam wa ai lit magam ni hpe n nyet kau ai sha dang lu ai made gun hpai shang lawm lu na atsam lu la na matu, lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)