Canterbury Mare Na San Pra Ai Adrian ( January 09 ) 09 January 2023

Canterbury Mare Na San Pra Ai Adrian ( January 09 )

San Pra Ai Adrian gaw, Africa Mungdan kaw na rai nga ai. Sanseng San Pra lam hte, Latin, Greek laika hpaji lam hte seng nna, mying grai kaba let sak hkrung ng alai was ai. Chyoipra ai Ja Chyum Laika hte Nawku Hpung na Kawa ni, ( Fathers of the Church ) hte seng nna, grtai chye ai Jau langai mi mung rai nga ai.

Jau tai ai hpang, Italy mung, Monte Cassino mare makau kaw na Jau tawra (monk) jawng kaw na Jau kaba lit shatsam ya hkrum nna, gumhpai lai wa sai rai nga ai. Dai hpang Sarabyin San Pra ai Vitalian gaw Jau Adrain a atsam marai hpe kam ai majaw Canterbury mare kaw na San Pawlu hte Petru nawku htingnu kaw jawng dung Jau lit shatsam ya sai rai nga ai.

Shi a hpaji machye machyang ni gaw makam masham sharin la na matu ra sharawng nga ai masha ni a matu grai akyu pru manu dan ai lam tai was ai. Shi gaw Ja Chyum Mungga hte seng nna, grai ningtawn ai wa rai nga ai majaw, shi a sharin achyin ya hkrum ai ni law wa ma ai hte, dai masha law law gaw shi a hpang hkan ni tai wa ma ai. Shi gaw Latin ga hte  Greek ga hpe alak mi nan chye ai hpaji ninghkring langai mi mung rai nga ai. Bai nna, shi gaw, ga shagawp hpaji, shata shagan hpe yu nna mahtai la ai hpaji ( Astronomy ) mung tang du hkra chye sharin ya ai Jau langai mi rai nga ai. Shi nga ai Jau tai jawng de jawngma law law du shang wa ma ai. Dai majaw shi a hpaji ningtawn ai shiga gaw shara shagu de chyam bra mat sai rai nga ai.

Shingrai, San Pra ai Adrian gaw AD (710) ning, January Shata (9) ya sani madu hta yup pyaw ban san mat wa sai rai nga ai. Shi n nga mat ai hpang nawku hpung gaw shi hpe san pra ai masha dang da let, shi a poi nhtoi hpe mung January shata (9) ya shani ngu masat da ya sai rai nga ai.

Dai ni San Pra ai Adrian a poi nhtoi hpe galaw nga ai ten, anhte yawng mung hpaji lam hta ra rawng ai ten, makam masham lam hta gawng kya ai ten ni hta San Pra ai Adrian kaw lak lai ai chyeju ni hpyi la nga ga ngu, n gun jaw dat lu n ngai law.

By;

Sister Rose Angeline Maran Nang Doi (SFX)

RVA-Kachin Service (Myitkyina)