Canossa Mare na San Pra ai Magdalene a Poi Nhtoi (May 8) 08 May 2022

Canossa Mare na San Pra ai Magdalene a Poi Nhtoi (May 8)

San Pra ai Magdalene gaw, Italy Mungdan, Canossa Mare kaw lai wa sai 1774 ning, March shata praw (1) ya shani hta grai lusu nga pyaw ai kanu kawa ni kawn shangai chyinghkai wa ai rai nga ai. Shi gaw, Lusu kasha rai nga ai raitim, dinghta sut gan hte hpaji Janmau gup lu na ahkaw ahkang hpe shingdu gayin da nhtawm, matsan mayan re ai masha ni, chyahkrai ma ni, mawhpyi num sha ni a lapran kaw bungli galaw let, sak hkrung nga lai wa sai rai nga ai. Masha ni e, n kaw n law re ai ni hte rau matsan mayan re ai gawk kaw nga lai wa sai.

Shi a kanu yan kawa gaw, shi hpe grai ahkang aya kaba ai uphkang du ni hte dinghku de ya nna, shanhkawng gaw, kashu kasha marai (5) lu ma ai. Madu wa gaw, grai jau si mat nna dinghku bai de ai majaw, shi a kasha (5) hpe kaga amyu shayi langai mi yu gawn ya wu ai.

Kaji ai aten kaw nna, Magdalene gaw, ayak ahkak re ai ni hpe myit su ai ladat hte hkam sharang chye ai jan mung rai nga ai. Wudang ntsa kaw jen noi sat kau hkrum ai Madu Yesu zawn matsan mayan, yak hkak jam jau hpe hkam sharang na myit dawdan da nu ai. Matsan di kai ni hpe yu gawn na lit hpe madung tawn nna lata la wu ai.

San Pra ai Magdalene gaw, lai wa sai 1808 ning hta Verona mare “Matsan Dum Lama Amyu Shayi Wuhpung” (Canossian Sisters @ Institute of the Daughters of Charity) hpe, bai nna 1831 ning hta Venice Mare kaw na, “Matsan Dum Lama Shadang Sha Wuhpung” (Sons of Charity @ Canossian Brothers and Fathers) hpe gaw de hpang da ya sai rai nga ai.

San Pra ai Magdalene gaw, 1835 ning, April shata (10) ya shani hta, Madu kaw yup pyaw ban sa mat wa sai rai nga ai.

Shi n nga mat ai hpang, 1941 ning, December shata (7) ya shani, dai aten na Wa Sarabyin Pius (12) kawn, Shi hpe A Lu ai Masha masat shagrau dat ya sai rai nga ai.

Dai hpang, 1988 ning, October shata praw (2) ya shani hta gaw, dai aten na San Pra ai Wa Sarabyin Yawhan Pawlu (2) kawn, Shi hpe San Pra ai Masha dang dat let, Shi a Poi Nhtoi hpe mung, May shata (8) ya shani ngu masat shagrau dat ya sai rai nga ai.

San Pra ai Magdalene ra sharawng dik htum gaw: Masha shagu hte ni ni htep htep nga lu na matu, sak hkrung lam hte seng nna Karai Kasang a yaw shada ai lam hpe masha yawng hte arau hkam sha myit lu la na matu, anhte a Kawa Karai Kasang a kaja ai lam masha shagu hpe tsun dan lu na matu” ndai lam ni rai nga ai.

Daini Nawku hpung gaw, Canossa Mare na San Pra ai Magdalene a Poi Nhtoi hpe galaw nga ga ai ten hta, anhte hpung masha ni mung, San Pra ai Magdalene zawn, tinang lu ai ja sut kawn yak hkak jam jau hkrum ai ni, kabai da hkrum ai, jahkrai nmai ni hpe gam garan jaw ya lu ai ni byin tai lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)