Brindisi Mare na, San Pra ai Lawrence a Poi Nhtoi (July 21) 21 July 2023

Brindisi Mare na, San Pra ai Lawrence a Poi Nhtoi (July 21) 

San Pra ai Lawrence gaw, Italy Mungdan, na, Brindisi mare hta lai wa sai 1559 ning, July shata (22) ya shani shangai chyinghkai wa ai rai nga ai.

Shi gaw, asak (16) ning hta Verona mare na Capuchin Franciscan Tawra Jau Wuhpung de shang mat wa ai. Padua Dakkasu hta laika hpaji sharin nga ai aten hta ga hpan law law hte chyum mungga hpe alak mi chye la lu nu ai. Shi Jau tai wa ai hpang, Wa Sarabyin Clement (8) gaw, shi hpe Roma mare na Yuda masha ni a makam masham gale shang wa na magam bungli hta gun hpai na matu lit shatsam ya ai

1598 ning hta Lutheran hpung gaw, Germany Mungdan hte Austria Mungdan masha ni hpe jahkrit shama wa ai shaloi San Pra ai Lawrence hte Kaga Capuchin Jau Marai (11) hpe dai mang hkang lam hta hkan na matu hte Capuchin Jau ni hpe woi zinlum na matu lit shatsam dat ma ai.

Jau Lawrence a myit jasat, atsam marai, mahkrum madup, woi awn ai atsam ni hpe mu chye ya ai Hkawhkam Emperor Rudolf (3) gaw, mungdan de htim shang wa nga ai Turk tai hpyen ni hpe ning hkap na matu, kaga Kahtawlik hkawhkam kasha ni hpe zinlum nna woi awn na lit Jau Lawrence hpe jaw wu ai. Turk tai hpyen ni hte gasat hkat ai Stuhlweissenburg majan hta Turk tai hpyen n gun gaw, shadawn n lu hkra law la nga ai. Raitimung, shadum mungga tsun ngut ai hpang hkum nan gumra jawn nhtawm Wudang Sumla jum let hpyen hpung ting a shawng kaw sa wa ai Jau Lawrence a majaw, tai hpyen ni hpe dang kau lu ma ai.

Jau Lawrence gaw, Italy Mungdan kaw asim sha tara shadik nga na matu bai nhtang du wa ai shaloi shanhte a wuhpung na lit hkam madung, Minister General shatai kau hkrum nu ai. San Pra ai Jau Lawrence gaw, Naples mare masha ni, Spain Mungdan na Hkawhkam Philip (2) hpe tang shawn ai lam madi shadaw lawm na matu 1619 ning hta rawt sa wa yang, Portugal mungdan, Lisbon mare kaw du ai shaloi, Madu hta yup pyaw ban sa mat wa sai rai nga ai.

Shi n nga mat ai hpang, 1783 ning, June shata praw (1) ya shani hta dai aten na, Wa Sarabyin Pius (6) kawn, shi hpe A Lu ai masha ngu masat dat ya sai rai nga ai.

Dai hpang, 1881 ning, December shata (8) ya shani hta gaw, dai aten Wa Sarabyin Leo (13) kawn, Shi hpe e San Pra ai Masha dang dat let, Shi a Poi Nhtoi hpe mung, July (21) ya shani masat shagrau dat ya sai.

Dai hta n-ga, 1960 ning hta, shi a san seng san pra ai myit jasat hte nden ja ai myit ni a majaw sha n-ga, shi a machye machyang lam hta alak mi rai kung kyang ai majaw, Nawku Hpung gaw, shi hpe “Hpaji Ninghkring” nga nna masat shagrau dat ya sai rai nga ai.

Daini Nawku Hpung gaw, Brindisi Mare na, San Pra ai Lawrence a Poi Nhtoi hpe galaw nga ai aten hta, anhte hpung masha ni mung, Wa Jau Lawrence zawn teng man ai lam hta gwi gwi tsap lu ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)