Boulancourt Mare na A-lu ai Emilina a Poi Nhtoi (October 27) 27 October 2023

Boulancourt Mare na A-lu ai Emilina a Poi Nhtoi (October 27)

A-lu Emilina gaw, 1115 ning hta shangai wa ai rai nga ai. Shi a Fransik Mungdan, Haute-Marne mare kaw na Cistercian Mama ni a Boulancourt Mama Jawng kaw sak hkrung aten tup sa nga mat ai.

Shi gaw, myihtoi atsam shaman chyeju lu ai yu maya hking bu hpun ai Mama (Lay Sister) rai nga ai. Shi gaw, asim sha rai tara shadik let, yu maya amu ni hpe ra n rawng hkra atsawm rai hkan galaw nna nga ai. Apyaw sha nga lu na matu shi galoi n myit ai. Shi gaw, Wudang ntsa Madu Yesu hkam lai wa sai nni nkri yubak lam ni hpe ding yang myit sumru yu nna, akyu hpyi shakut ai. Shi gaw, kara hte ju hpe da la nhtawm hpri sumri hte hkri ai palawng hpe hpun ai; kashung ta hta pyi hkyedin ndin ai sha nga lai wa sai.

A Lu ai Emilina gaw, bat mi hta masum ya lusha gam ai, kaga hpa mung n lu n sha ai; jam jau hkam let akyu hpyi nna aten shalai ai. Karai Kasang hpe Shakawn Kungdawn Laika na shakawn ga ni hte shakawn let nga ai. Shi a san seng san pra ai nga sa lam hte shakut shaja ai myit jasat ni a shiga gaw, makau grup yin de du hkra chyam bra mat wa ai. Masha law law shi kaw nna hpaji sa hpyi la ma ai. Shaloi shi gaw, shagrit shanem ai myit, hpu nau tsawra myit, shakut sharang let myit mi a galu rai, shanhte hpe hpaji jaw ai. Shi a kasi kaja hpe mu lu ai majaw, masha law law makam masham hpe hkap la nna san seng san pra ai sak hkrung lam hta nga mat wa ma ai.

A-lu ai Emilina gaw, 1178 ning, Shi a asak (63) ning hta, Madu kaw yup pyaw ban sa mat wa sai rai nga ai. Shi n nga mat ai raitim, Shi hpe tsawra let shi a kasi hpe hkan galaw shatup ai ni grai law wa ma ai.

Emilina n nga mat ai hpang, Nawku Hpung gaw, Shi hpe A Lu ai Masha ngu shagrau dat let, Shi a Poi Nhtoi hpe mung, shaning shagu October shata (27) ya shani ding yang galaw ya taw ai rai nga ai.

 Daini Nawku Hpung gaw, Boulancourt Mare na A-lu ai Emilina a Poi Nhtoi hpe galaw nga ga ai aten hta, anhte Hpung Masha ni mung, A Lu ai Emilina zawn, tinang n nga mat ai hpang, tinang a mai kaja lam, tsawra matsan dum lama chye ai myit ni hpe masha yawng e, mu la, kasi yu la lu mu ga matu, mai kaja ai prat hte sak hkrung hkawmsa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)