Avila Mare na San Pra ai Yawhan a Poi Nhtoi (May 10) 10 May 2023

Avila Mare na San Pra ai Yawhan a Poi Nhtoi (May 10)

Avila Mare na San Pra ai Yawhan hpe tara hkaw ningtawn ai san pra ai masha ni rai nga ai (Avila Mare na San Pra ai Teresa, Wudang a San Pra ai Yawhan, San Pra ai Francis Borgia hte Alcantara Mare na San Pra ai Peter) ni a wenyi lam woi wa, nga nna shamying shagrau ya nga ai re. Shi ka da ai wenyi laika ni, grau nna shagun laika ni hpe moi na Spain Mungdan a manu dan dik ai laika nga nna masat da nga ai re.

San Pra ai Yawhan gaw, 1499 ning, January shata (6) ya shani, Spain Mungdan, New Castile mare kaw shangai chyinghkai wa ai rai nga ai. Shi a Kanu yan Kawa gaw, Almordovar del Campo lawk kaw nag rai lusu ai htinggaw kaw na rai nga ai. Kanu yan Kawa gaw, shi hpe hkansa ritkawp tara hpaji sharin na matu, Salamanca Dakkasu de sa dat ma ai raitim, shi gaw, sasana magam gun sak hkrung lam hpe lata lai wa sai.

Shi gaw, Alcala mare kaw hpaji shrin la ai hpang Jau tai wa sai. San seng san pra lam hpe n dan n dawng ai tara shatup ai hpe madung tawn let sak hkrung nga lai wa sai. Shi gaw, mungga hkaw ai lam hta grai ning tawn ai wa mung rai nga ai. Dai atsam a majaw, masha law law shih pang de du sa wa ma ai; wenyi hte seng ai hpaji mung sa hpyi la ma ai. Shi a hkaw matsun sharin ai atsam a majaw, masha law law hpe myit malai lu shangun nna Hkristan Hpung masha jashawn la lu sai rai nga ai.

Kanu yan Kawa n nga mat ai hpang, shi gaw ja sutgan grai madu lu nu ai. Raitimung, dai sutgan ni hpe matsan masha ni hpe galaw daw nna asung jashawn kau wu ai. Shi gaw, Karai Kasang hte htep lahti rai nga ai majaw, myit sim myit sa lam lu ai; matsan masha ni hpe galaw daw jau lu ai majaw, grai myit pyaw nu ai. Andalusia ginwang hta e shi hpe Sasana magam gun ai majaw, shi hpe “Andalusia a Kasa” nga nna mung shamying shagrau ya ma ai.

San Pra ai Yawhan gaw, 1569 ning, May shata (10) ya shani hta Madu kaw yup pyaw mat wa sai rai nga ai.

Shi n nga mat ai hpang, 1894 ning, November shata (12) ya shani hta dai aten na Wa Sarabyin Leo (13) kawn shi hpe A lu ai masha dang dat sai rai nga ai.

Dai hpang 1970 ning, May shata (31) shani hta gaw, Wa Sarabyin Pawlu (6) kawn shi hpe San Pra ai masha dang dat let, Shi a Poi Nhtoi hpe mung May shata (10) ya shani ngu masat shagrau dat ya sai rai nga ai.

Daini Nawku hpung gaw, Avila Mare na San Pra ai Yawhan a Poi Nhtoi galaw nga ga ai aten hta, anhte marai hkum shagu mung, Karai Kasang Wa kaning re ai asak hkrung lam hte shaga nga ai kun ngu ai hpe galoi mung, myit sawn sumru yu let, Shi Madu Karai Wa myit ra ai sak hkrung lam hte hkawmsa lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)