Avila Mare na San Pra ai Teresa a Poi Nhtoi (October 15)

Saint Theresa of Avila (October 15)

Avila Mare na, San Pra ai Teresa gaw, hkansa rit kawp tara ja la ai, mi man magap da ra ai Discalced Carmelite Mama Wuhpung shang masha langai mi mung rai nga ai. Shi gaw, Italy Mungdan, Avila mare hta 1515 ning, March shata (28) ya shani hta shangai chyinghkai wa ai rai nga ai. Shi a Ma kaji ten kaw nna, htum mat n chye ai wenyi asak a lam hpe myit sumru yu nna, shi hkum hpe Karai Kasang kaw ap kau wu ai.

Teresa a asak (12) ning sha naw rai yang, shi a chyinghkai kanu n nga mat nu ai. Shaloi, Teresa gaw Nu Maria a sumla makau de sit sa wa nna, “Nu e, ya aten kaw nna nga gaw nye a Nu tai ya rit le yaw” nga nna akyu sa hpyi ai.

Shi a asak (20) ning du ai shaloi Carmelite Mama Jawng de shang mat wa nu ai. Raitimung, dai jawng na Mama ni a nga sat nga sa lam gaw, yu n htuk ai hpe mu lu wu ai. Shanhte gaw, tinang hkrai sha akyu hpyi ai lam, myit sumru yu ai lam n galaw ma ai. Mama jawng wang kata de mung, kam ai wa kam ai aten hta pru shang nga ai hpe mu nna myit grai kataw mat wa nu ai.

Dai kaw nga ai Mama ni malawng maga gaw, lagawn lamawn re ai numsha ni, yaw shada ai lam n nga ai numsha ni rai taw nga ai hpe mu mada wu ai. Teresa gaw, dai zawn re ai numsha ni a lapran kaw du nga timung, Karai Kasang, shi hpe shaga la ai lam hpe myit dum let aten shagu hpe manu shadan let nga nga nu ai.

Teresa gaw, dai aten na Hpung Ningbaw ni law law pat hkum ai hpe n madat ai sha, 1561 ning hta Avila mare kaw Discalced Carmelite Mama Wuhpung hpe gaw de hpang dat wu ai. Dai Carmelite Mama ni gaw, mi man magap da ra ai, aten tup azim sha nga nna masha hpawng kaw n pru hkawm ai, akyu hpyi myit sumru yu ai lam hpe hkan shatup ra ai, shanhte a hkansa rit kawp tara gaw grai ja nga ai; shan hpyi hkyepdin a malai hpun pyen hte galaw da ai hkyepdin hpe din nna matsan mayan kasi madun let nga ma ai.

Carmelite Mama Wuhpung gaw de hpang da ai (6) ning na ai shaloi, Wudang hpe alak mi rai nna hkungga ai San Pra ai Yawhan (St. John of the Cross) hte San Pra ai Mama Teresa gaw, Discalced Carmelite Friars ngu ai Carmelite Tawra Jau Wuhpung hpe mung gaw de hpang da wu ai.

San Pra ai Teresa a Carmelite Mama Wuhpung gaw, laika hpaji hpe ahkyak kaba langai mi hku nna hkap la ma ai. Tang du ai Mama Wuhpung Magam Gun tai lu na matu, laika hpaji n chye yang n mai ai, ngu nna hkam la ma ai. San Pra ai Mama Teresa gaw, “Masha gaw tara shakut shatup na matu, tinang hkum nan mai shaman shakyang la lu ai; raitimung, hpaji chye ai masha byin tai wa lu na matu, shaman shakyang la na gaw grau yak la nga ai. Laika hpaji n chye ai wa gaw, ningtawn magaru grang ai wa n rai shi ai; madat mara chye, shagrit shanem chye ai masha naw rai nga ai. Anthe hpe Karai Kasang Wa gaw, a nya a tang re ai Mama n tai shangun u ga law” nga nna ayan tsun tsun re ai.

San Pra ai Mama Teresa gaw, lachyum chye madat yak ai shingran law law hpe mu yu ai. Lachyum grai sung ai laika buk ni law law mung ka tawn kau da wu ai. San Pra ai Mama Teresa n nga mat ai hpang, 1582 ning hta Nawku Hpung kaw nna, shi hpe “Nawku Hpung a Hpaji Ninghkring & Doctor of the Church” ngu nna shagrau masat dat sai rai nga ai.

San Pra ai Mama Teresa n nga mat ai hpang, 1614 ning, April shata (24) ya shani hta, dai aten na Wa Sarabyin Pawlu (V) kaw nna, Shi hpe A lu ai masha masat dat sai rai nga ai.

Dai hpang, 1622 ning, March shata (12) ya shani hta gaw, dai aten na Wa Sarabyin Gregory (XV) kaw nna, shi hpe San Pra ai masha dang dat let, Shi a Poi Nhtoi hpe mung, October shata (15) ya shani masat shagrau dat sai rai nga ai.

Daini Nawku Hpung gaw, Avila mare na San Pra ai Teresa a Poi Nhtoi hpe galaw nga ga ai aten, anhte marai hkum shagu hpe mung, mai kaja ai myit sawn lam, chye chyang kung kyang wa lu na hpaji ni hpe jaw ya rit ga matu, alak mi akyu hpyi la nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

Add new comment

6 + 11 =