Aurillac Mare na San Pra ai Gerald a Poi Nhtoi (October 13) 13 October 2023

Aurillac Mare na San Pra ai Gerald a Poi Nhtoi (October 13)

San Pra ai Gerald gaw, A.D (855) ning hta Fransik Mugndan kaw shangai chyinghkai wa ai rai nga ai. Shi a Kanu yan Kawa gaw, dinghku lum grai lusu ai ni rai nga ma ai. Bai nna, Kawa gaw, Auvergne ginwang uphkang du kaba rai nga ai. Dai majaw, shi gaw, manu dan dik ai sutgan kumhtaw hte rau hkring htawng lu na wa rai nga ai. Raitimung, shi hte rau nga kaba wa ai manaw manang ni hte myit jasat grai shai la ai; kaga masha ni hpe daw jaw daw ya ai shawang tsawra myit shi hta rawng nga ai. Shi lu ai sutgan ni hpe matsan masha ni hpe gam garan jaw kau ai.

Shi a sat lawat ni gaw, grai si mani ai. Kawa a hkang galai tai wa ai shaloi, seng ang ai lit hpe hkrak tup galaw gun hpai lai wa ai. Ginwang masha ni hpe tsawra matsan dum myit hte rap ra, dingman tara hte uphkang yu gawn lai wa sai. Shi a manaw manang ni mungkan a pyaw hpa lam ni hta len hkawm taw nga timung, shi gaw, akyu hpyi ai, laika hti ai hte wenyi lam myit sumru yu nna aten shalai kau kau rai nga ai.

San Pra ai Gerald gaw, A.D 890 ning hta, Aurillac mare hta, Benedictine Tawra Jau jawng hpe gaw gap da ya sai. Dai jawng gaw, dai mare hta sha n-ga mungkan shara shagu de du hkra mying kaba mat wa sai. Shi hpaw da ya ai, Benedictine Tawra Jau Jawng de shang mayu ai raitimung, Cahors mare kaw San Pra ai Saradaw Gausvert gaw, shi hpe hkum kau wu ai. Saradaw, shi hpe hkum pat kau ai lam gaw, shi a kawa shara kaw magam gun let ginwang ni hpe shi atsawm uphkang taw ai majaw, grau akyu rawng ai ngu mu ya nna rai na re, nga nna shi hkum nan mung hkam la wu ai.  

San Pra ai Gerald gaw, garai n si ai sanit ning tup mi nmu mat wu ai. Dai yawn hpa hpe Madu ra sharawng nna rai na re nga nna shi myit dik myit pyaw let hkap la wu ai.

San Pra ai Gerald gaw, A.D (909) ning, shi a asak (54) ning du ai shaloi, Madu htaw yup pyaw ban sa wa sai rai nga ai. Cluny mare kaw na, San Pra ai Odo gaw, San Pra ai Gerald a labau hpe ka da wu ai. Dai laika buk a majaw, San Pra ai Gerald a mying gaw, Fransik mungdan ting chyam bra mat wa sai rai nga ai.

San Pra ai Gerald n nga mat ai hpang, Shi hpe Nawku Hpung gaw, San Pra ai Masha dang dat let, Shi a Poi Nhtoi hpe mung, October shata (13) ya Shani masat shagrau dat ya sai rai nga ai.

Daini Nawku hpung gaw, San Pra ai Gerald a Poi Nhtoi hpe galaw nga ai hte maren, anhte a myit masin hta mung dinghta sutgan a majaw gumrawng gumtawng rai dum ai myit ni n rawng ai sha, San Pra ai Gerald zawn shagrit shanem ai myit hte sak hkrung hkawmsa lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)