Assisi Mare na San Pra ai Clare a Poi Nhtoi (August 11) 11 August 2023

Assisi Mare na San Pra ai Clare a Poi Nhtoi (August 11)

San Pra ai Clare gaw “Poor Clare” mying ai matsan mayan ni hpe garum madi shadaw ya ai Sasana Wuhpung hpe gaw de da ai Hkawnsek rai nga ai. Shi gaw, 1193 ning, July (16) ya shani hta Assisi mare na lusu nga pyaw ai kanu yan kawa kaw nna shangai chyinghkai wa ai rai nga ai. Shi a asak (19) ning du ai shaloi, Lusha Gam Ladaw hte seng nna San Pra ai Francis hkaw ai mungga hpe na lu ai hpang, Portiuncula mying ai shara de lagyim sa mat wa ai; shi hkum hpe Karai Kasang Wa hpe ap nawng kau ai.

San Pra ai Francis gaw, Clare a sari rawng la ai kara galu hpe zen kau, grai tsawm ai buhpun hpe rep di ya kau ai hpang, saihtung buri jahpun nhtawm Bastia mare na Benedictine Mama Jawng de sa sa kau ai. Clare a kanu yan kawa gaw, shi hpe bai sa woi la na matu sa wa ma ai; shaloi Clare gaw, nawku tawn hpe ngang ngang jum tawn n htawm; “Yesu hta lai nna kadai kaw mung num n wa na.” ngu tsun dat wu ai.

Dai hpang amyu shayi sha ni hte rau, San Pra ai Damiano Nawku jawng makau kaw “Poor Clare” mying ai Sasana Wuhpung langai hpe gaw de hpang sai. Dai Wuhpung gaw, matsan ai myit jasat majing hte laja lana rai jam jau jam hkau hkam sharang ma ai, hkyepdin n din ai; shani shagu lusha gam ai; grai sha n ra yang (shing n rai) matsan dum lama ai bungli hte sha n seng yang ga n shaga ma ai.

1228 ning hta Wa Sarabyin Gregory (9) gaw, shi hpe ladu shalai lusha n gam na ahkang jaw ai. Shaloi Clare gaw; “Hkristu a hpang hkan nang lu na lit a majaw n re; nye a mara ni raw shatsai kau hkrum na matu, ngai ndai hpe hkan shatup ra ai.” (I need to be solve from my sins, but not from the obligation of following Christ.) nga nna tsun ai. Dai majaw, Wa Sarabyin gaw shanhte a wuhpung hpe Privilegium Pauperitatis ngu ai ahkaw ahkang jaw ya ai. Dai gaw, shanhte hpe kadai mung arung arai lang ra ai nga nna n mai shagwi ai, n mai shadut ai, ngu ai rai nga ai. (Ladu lai matsan mayan rai tara shakut nga ai wa hpe “Dai zawn hkum shakut” ngu nna n mai hkum pat ai, ngu ai re)

1224 ning hta Hkawhkam Frederick (2) a hpyen hpung gaw, Assisi mare hpe jahten kau na matu htim gasat sa wa ai. Clare gaw, lata kaw Chyoi Pra Hkum hpe lang tawn nhtawm hkawhkam hpe sa pru jahkrum ai. Dai tai hpyen hpung ting mare masha kadai hpe hpa jam jau garai n lu jaw ai sha, a kajawng sha hkrit mat nna ayai aya rai hprawng mat wa shajang ma ai.

Ndai zawn, Sasana magam hpe gun hpai shakut nga ai aten, 1253 ning, August (11) ya shani, Shi nsa htum ni wa yang San Pra ai Clare gaw; “Madu e, ngai hpe hpan tawn da ai majaw, Nang gaw shakawn kungdawn a nga nga u ga law.” nga nna hpang jahtum Karai Kasang hpe chyeju dum shakawn kau da nu ai.

Shi n-nga mat ai (2) ning na ai hpang 1255 ning, September shata (26) ya shani hta, dai ten na Wa Sarabyin Alexander (4) hku nna, San Pra ai Masha dang dat nna, Shi a Poi Nhtoi hpe August Shata (11) Ya Shani masat dat sai rai nga ai. 

Daini Nawku Hpung gaw, Assisi Mare na San Pra ai Clare a Poi Nhtoi hpe galaw nga ga ai aten hta, anhte hpung masha ni mung, San Pra ai Clare zawn, tinang kaning re ai asak aprat hte hkawm sa taw ai raitim, Karai Kasang Wa hpe chyeju shakawn shagrau lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)