Arles Mare na San Pra ai Virgil a Poi Nhtoi (March 5)

San Pra ai Vrigil gaw, Tsa ban (6) grup yin hta Fransik Mungdan, Gascony mare hta shangai chyinghkai wa ai rai nga ai. Shi gaw, Saint Monorat Zinlawng na, Lerins Tawra Jau Jawng kaw laika hpaji sharin hkam la lai wa ai. Shi, Tawra Jau tai wa ai hpang Autun mare kaw na Lerin hte Saint Symphorien Jau jawng ni hta Jau kaba lit shatsam hkrum lai wa sai.

San Pra ai Virgil gaw, Sarabyin Gregory (I) a ga madat nna Tawra prat hpe tawn kau da nhtawm Arles mare na Saradaw aya tang da ai hpe hkap la wu ai. Sarabyin Gregory matsun ai hte maren shi gaw, San Pra ai Augustine hpe Canterbury mare na Saradaw sa shatai ya wu ai.

Shi gaw, ningbaw kaja shaman chyeju lu ai, wenyi hpe hkye la ai amu hpe grai sharawng ai majaw, shi a Saradaw ginwang hta Nawku Jawng ni law law lu gap da sai. Makam masham hpe galoi mung laknak zawn lang da jang, dingbai dingna jaw ai lam ni kade law timung, Karai Kasang a mungga hpe awng dang ai hte lu gun ai lam hkam la wu ai. Karai Kasang a ntsa e kamhpa ai myit ni a majaw, shi galaw sa wa ai magam bungli shagu hta mung, ra ai shaman chyeju n gun atsam ni grau lu la nga ai. Nden ja ai myit hte Karai Kasang a mungga grai chyam bra wa hkra hkaw shabra ai majaw, masha law law myit galai shai wa nna, Nawku Hpung de shang wa ma ai.

San Pra ai Virgil gaw, A.D 610 ning hta Madu kaw yup pyaw ban sa mat wa sai rai nga ai. Shi n n ga mat ai hpang, shi kaw garum chyeju hpyi la ai ni gaw, mau hpa lamik kumla hte akyu law law hpe hkam la lu ma ai lam, shi a labau hta ka matsing da nga ai.

Dai hta n nga, shi n nga mat ai hpang, Nawku hpung gaw, San Pra ai masha hku nna masat dang dat let, Shi a Poi Nhtoi hpe mung, March shata (5) ya shani ngu masat shagrau dat ya sai rai nga ai.

Daini Nawku hpung gaw, Arles Mare na San Pra ai Virgil a Poi Nhtoi hpe galaw nga ai hte maren, anhte hpung masha ni mung, Makam masham hpe galoi mung laknak zawn lang da nna, dingbai dingna jaw ai lam ni kade law timung, Karai Kasang hte arau sha hkawmsa lu na matu lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)