Arc Mare na San Pra ai Joan a Poi Nhtoi (May 30) 30 May 2023

Arc Mare na San Pra ai Joan a Poi Nhtoi (May 30)

San Pra ai Joan gaw, 1412 ning hta January shata (6) ya shani, Fransik (Yan a Pyin-thit) Mungdan Domremy mare kaw na amu galaw sha ai hte makam masham grai ngang ai kanu yan kawa kawn shangai chyinghkai wa ai rai nga ai.

Shi gaw, asak grai naw kaji ai aten kaw na, Lamu kasa Michael, San Pra ai Margaret hte San Pra ai Catherine ni kawn shi hte seng ai lam, yawng hte seng ai lam ni sa tsun dan ai hpe na la lu ai. Dai zawn re ai hta na, 1428 ning, May shata lani mi hta, shi na lu ai lam gaw, “Fransik Hkawhkam hpe sa jahkrum u, Fransik Mungdan hpe bai lu la hkra nang shi hpe garum jaw u” nga ai lam re.

Dai zawn rai nna, Shi a asak (17) ning sha naw rai yang Fransik mung na Orleans Mare hpe hpyen ma ni loi mi hte sha bai hkye la lu sai rai nga ai. Hpang na majan poi shagu hta shi awng dang wa lu sai. Dai majaw, Fransik Hkawhkam Charles (7) gaw, Rheims mare de bai du shang wa lu nna, San Pra ai Joan a makau kaw, Hkawhkam Jan mau shagup ai hpe bai hkam la lu nu ai.

1430 ning, May shata hta Brugandy ginwang na, Fransik amyu sha ni gaw, Joan hpe mara amyu myu shagun let rim la nhtawm shanhte a tai hpyen rai nga ai English ni a lata de ap kau ma ai. Dai shaloi Fransik Hkawhkam Charles (7) hte Fransik amyu sha ni gaw, Fransik amyu shani rai nga ai Joan hpe hkye la na lam tsep kawp n galaw ma ai sha n-ga grau nna she kabu nga ma ai. English uphkang du ni gaw, Joan Mahkawn hkawn Ji hpe magup zingri shatsang ai hpang shadaw kaw jen noi let wan nat sat kau ma ai. Dai lam gaw, 1413 ning, May shata (30) ya shani, Joan a asak (19) ning sha naw aten,  byin lai wa ai lam rai nga ai.

Dai zawn wan nat sat kau ai hpang (30) ning du ai shaloi she Joan hpe shanhte shagun ai mara ni tsep kawp n jaw ai, lachyum n rawng ai re lam chye wa ma ai.

Shi n nga mat ai hpang, 1909 ning, April shata (18) ya shani, dai aten na Wa Sarabyin Pius (10) kawn, Shi hpe A-lu ai masha ngu masat shagrau dat ya sai rai nga ai.

Dai hpang, 1920 ning, May shata (16) ya shani, dai aten na Wa Sarabyin Benedict (15) kawn, Shi hpe San Pra ai Masha dang dat let, Shi a Poi Nhtoi hpe mung, May shata (30) ya shani ngu masat shagrau dat ya sai rai nga ai.

San Pra ai Joan gaw, Makam Masham hte tinang a daidaw buga, mungdan a matu asak ap nawng makawp maga ya ai ni a kasi kamang madung tai ya ai, San Pra ai Masha mung rai nga ai. Dai majaw, daini Nawku Hpung gaw, Arc Mare na San Pra ai Joan a Poi Nhtoi hpe galaw nga ai aten hta, anhte mung San Pra ai Joan zawn tinang a buga hte mungdan hpe makawp maga lu ai ni byin tai lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)