Antioch Mare na San Pra ai Ignatius a Poi Nhtoi (October 17) 17 October 2023

Antioch Mare na San Pra ai Ignatius a Poi Nhtoi (October 17)

San Pra ai Ignatius gaw, Kasa Yawhan hpe garum ya ai wa rai nga ai. Shi hpe Kasa Petru hkum nan Antioch mare kaw na, Saradaw lit shatsam ya sai. Shi gaw, asak (40) ning jan hkra sasana magam gun ningbaw ni a kasi kamang tai nna Nawku Hpung a matu shakut lai wa sai.

Nawku Hpung hpe zingri ai Trojan hkawhkam gaw, Saradaw Ignatius hpe Roma mare de rim mat wa nna, matse labye dusat ni hpe jaw sha kau na matu lajang ai. Roma mare hte Antioch mare gaw grai tsan gang hkat nga ai. Shi hpe rim mat wa ai dai hkrun lam na Samina (Shnr) Smyrna,Troas hte kaga mare kahtawng shagu kaw na shi hpe mu dat ai Hpung masha shagu gaw, shi hpe grai hkalum nna akyu hpyi ya let n ja n hpra shakram dat ma ai.

San Pra ai Ignatius gaw mying kaba ai “Shagun Laika” – shaga let shakram kau da ai. Roma mare kaw na Hpung masha ni gaw, Saradaw Ignatius hpe hkye la lu na matu, seng ang ai du gyi salang ni hpe lagyim kumhpa jaw na shakut ma ai. San Pra ai Saradaw Ignatius chyawm gaw, shanhte hpang de laika shagun nna: “Ngai gaw matse dusat ni a lusha tai lu u-ga law; shanhte (matse labye dusat ni) gaw, nye a matu Karai Kasang hpang de du lu shangun ai hkrun lam ni she rai nga ai. Madu Yesu a lusha majing tai nna, dai dusat ni a n-gup na wa ni hte maya sha kau na, Karai Kasang a hkaulam mam she ngai tai u gaw law.” nga nna ka let shakram kau da wu ai.

Saradaw Ignatius gaw, A.D (107) ning hta Roma mare de du shang wa ai hte rau, dusat ni a lusha shatai nna shamyit kau na matu Kolosius ngu ai, masha ni Shi hpe zingri sat ai shara de woi shang mat wa manu ai. Dai wang kata de, shi du shang wa ai hte rau, lahkawng ya tup lusha n jaw sha ai shakyet tawn da ai hkanghkyi lahkawng e amya sha kau hkrum nu ai. Li loi sha ngam ai shi a nrut nra ni hpe Syria mungdan na, Antioch mare de la wa nna, makoi mayang tawn ai hpang, Hkawhkam Theodosius a lakhtak hta Roma mare kaw na Nawku jawng langai mi kaw htawt makoi mayang kau ma ai. Ya aten e, dai shara hpe grai hkungga la ra jaw let manu shadan nga ai rai nga ai.

Saradaw Ignatius n nga mat ai hpang, Nawku Hpung kawn, Shi hpe San Pra ai Masha dang da let, Shi a Poi Nhtoi hpe mung, October shata (17) ya shani masat shagrau dat sai rai nga ai.

Daini Nawku hpung gaw, San Pra ai Ignatius a Poi Nhtoi hpe galaw nga ga ai hte maren, anhte mung, kaning re ai masa lam ni hte hkrum kadup wa tim, anhte a myit hta kam sham ai myit hpe n nyet kau ai sha, gwi gwi sakse hkam lu ai ni byin tai nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)