Antioch Mare na San Pra ai Barlaam a Poi Nhtoi (November 19)

San Pra ai Barlaam gaw, Hkawhkam Diocletian e Nawku Hpung hpe laja lana rai zingri sat shamyit nga ai aten, tsa ban (3) hta sak hkrung nga lai wa sai rai nga ai. Dai aten hta, Nawku Hpung masha ni gaw, tinang a makam masham hpe, lagyim nna sha hkan shatup galaw lu mai ai rai nga ai. Ndai zawn mayun mayoi lagyim nna hkan shatup taw ai lam ni hpe n kaja ai masha ni chye mat mat rai nga ma ai.

San Pra ai Barlaam gaw, Antioch mare kaw na, laika hpaji n chye ai yu maya Hpung masha re lam hpyenla ni chye mat nna, shi hpe htawng kaw grain a hkra rim bang da nna, A.D 304 hta tara je yang daw dan lai wa ai. Shi gaw, masha myit n myit ai ni e, zingri shatsang ai lam, jahpoi asawng ai lam ni law law hkrum sha timung, Madu a ntsa, sadi galoi mung dung nga nu ai. Shi a lata hpe grai kahtet ai wan n-ga ntsa kaw mara ya ai, dai wan n-ga hta hpun naw “mu-ra” ju nna gakang ya ma ai. Tara agyi wa gaw, ndai zawn wan n-ta ntsa lata mara nna zingri sat timung, makam masham hpe n nyet ai majaw, Barlaam hpe grai yum au nga ai. Dai majaw, shi hpe baw kahtam di kau ya na matu daw dan ya wu ai.

Shi a Poi Nhtoi hpe, Nawku hpung gaw, November shata (19) ya shani ngu masat galaw ya nga ai rai nga ai.

Anhte mung, Antioch Mare na, San Pra ai Barlaam zawn, makam masham hte seng nna, n hkrit n tsang sakse hkam lu ai ni byin tai lu hkra shakut sa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)