Alu ai Wa Jau Junipero Serra / Father Junipero Serra (1713-1784)

Alu ai, Miguel Jose serra gaw, Spain mung na Mojorca zinlawng kaw 1713 ning, November shata (24) Ya shani shangai chying hkai wa ai. Franciscan Jau Tawra Wuhpung de shang ai hpang shi a mying hpe Junipero ngu shamying wau ai. 1737 ning hta, Jau shatai Sakramentu hkam la ai hpang 1749 ning du hkra Padua mare na Dakkasu hta myit sawn hpaji (Philosophy) hte Karai the seng ai hpaji (Theology) hpaji ni hpe sharin Sara lit magam gun hpai lai wa ai.

1750 ning, January shata praw (1) hta Mexico mare kaw du ai ten kaw nna, shi si ai aten du hkra, dai shara de nnan du shang wa ai, “People of New World” masha ni hpe makam masham de gale shang wa na matu shakut kau da ya lai wa sai.

1768 ning hta Wa Jau Serra gaw, Jesuit Jau Wuhpung ni lit magam gun shara ni hta kahpa galai nna bai gun hpai lai wa ai. America Dan Sinna pang hkin-gau hta, Karai Kasang a mung hkaw shachyam ya ai. Jau jawng ni grai law hkra hpaw hpang da ya ai., 1770 ning hta, Montoly Panglai hpung-gaw kaw, Wa Jau hkum nan hpaw da ya ai, Missionary of San Carlos Borromeo jawng gaw, mying kaba di kai, Carmel Mission jawng rai nga ai. Shi a akyu hpyi shaja ai, hkam sharang let shakut shaja ai kasi nih pe mu nna, Indian amyu sha ni law law Hkristian makam masham de shang wa masai.

Wa Jau Serra gaw, 1784 ning, August Shata (28) ya shani, Madu hta yup pyaw ban sa mat wa sai rai nga ai. Shi hpe, san Pra ai Wa Sarabyin Yawhan Pawlu (2) gaw, 1988 ning, September shata (28) ya shani, Alu ai masha ngu nna, masat shagrau dat sai rai nga ai.

By; Sister Rose Angeline Marang Nang Doi (SFX)

RVA-Kachin Service (Myitkyina)