Alu ai Apollinaris hte shi a Manang Ni a Poi Nhtoi (September 12)

1617 hte 1632 ning lapran Japan mungdan kaw Hkristian Hpung shang ni hpe laja lana zingri shamyit ai lam byin ai. Makam masham a majaw sat shamyit hkrum na Hkristian ni 200 kaw na, 6 gaw Japan Asuya e rim la hkrum ma ai.

Shanhte kaw na marai 18 gaw, Japan mung na shanhte wuhpung a ningbaw, Commisary Provincial rai nga ai Apollinaris franco woi awn ai First Order Franciscan wuhpung shang ni rai ma ai. Japan asuya gaw Hkristian tai jang sat kau na tara jahkrat tawn ai. Alu ai Apolinaris gaw shi makam masham hte Karai Kasang hpe shi tsawra ai lam, shawa a man e asan sha tsun ai majaw rim kau hkrum ai. Omura htawng kaw manga ning sharawng da hkrum ai; htawng masha ni hpe shi tara ga sharin ya nna Kashin Kamun hkam ya ai. Htawng kata e aten na na akyu hpyi nna, byin mai ai daram ruyak hkam sharang ai; shi a sumnung shingdi ai hte shagrit shanem ai myit jasat ni hpe mu nna, masha law law myit malai lu let, Hkrustian makam masham de bai gale shang wa ma ai. Shawng de Hkristian garai n tai ai ni law law mung Nawku Hpung de gale shang wa ma ai.

Japan uphkang aya lu ai ni gaw Alu ai Apollinaris hte shi a Franciscan Hpung magam gun manang ni hpe, 1622 ning September shata 12 ya shani wan nat sat kau ma ai.

Daini Nawku hpung kaw nna, Alu ai Apollinaris a Poi Nhtoi hpe galaw ya nga ai shani, anhte a myit kraw kata hta mung, shagrit shanem ai myit masin hte tinang lu da ai makam masham nli tum hpe manaw manang ni hpe gam garan ya lu na atsam hpe jaw ya rit ga matu, akyu hpyi la nga ga law.

By;

Sister Rose Angline Maran Nang Doi (SFX)

RVA-Kachin Service (Myitkyina)