Alexandria Mare na San Pra ai Catherine a Poi Nhtoi (November 25)

San Pra ai Catherine hpe Engpyt Mungdan, Alexandria mare kaw, A.D 287 shangai chyinghkai wa ai rai nga ai.

Catherine Shi a asak (18) ning du ai hte shi a daidaw buga hta Madu a Kabau Gara Mungga hpe pu ba ai lam n nga ai sha galaw hkaw matsun lai wa sai rai nga ai. Dai zawn rai nna, Madu a Kabu Gara Mungga hpe hkaw tsun ai majaw, Hkawhkam Maximus pawt nna, htawng hta sharen da ai hkrum nu ai. Raitimung, shi myit n htum ai sha, hkawhkam jan hte htawng sin ai ni hpe Hkristan makam masham de gayin wa hkra mungga hkaw wu ai. Dai zawn shi Mungga hkaw ai majaw, hpang jahtum makam masham a majaw sak kau hkrum wu ai.

Dai majaw, San Pra ai Catherine gaw, asak grai naw kaji yang n nga mat wa ai rai nga ai.

Catherine n nga mat ai hpang, Nawku hpung gaw, shi hpe San Pra ai masha dang dat let, Shi a Po Nhtoi hpe mung, November shata (25) ya shani ngu masat shagrau dat ya sai rai nga ai.

Daini Nawku Hpung gaw, San Pra ai Catherine a Poi Nhtoi hpe galaw nga ga ai aten hta, tinang lu da sai makam masham hpe gara shara kaw mi du du, n hkrit n tsang sakse hkam ra ai lam hpe San Pra ai Catherine gaw, anhte hpe shadum ya nga ai. Dai majaw, Anhte hpung masha ni mung, tinang lu da sai makam masham hpe gara aten hta raitim, sakse hkam lu ai ai ni byin tai lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)