Alexandria Mare na San Pra ai Athanasius a Poi Nhtoi (May 2) 02 May 2023

Alexandria Mare na San Pra ai Athanasius a Poi Nhtoi (May 2)

San Pra ai Athanasius gaw, Kahtawlik Makam Masham hte seng nna ningbaw kaba langai mi rai nga ai. Shi gaw, A.D (293) ning hta Egypt Mungdan, Alexandria mare kaw shangai chyinghkai wa ai rai nga ai.

Shi gaw, Karai Kasang hte seng ai hpaji (Theology) hpe sharin la ngut ai hpang Alexandria mare kaw na Saradaw Kaba a amu madu lit magam, dai hpang Sara n nga mat ai majaw shi a hkang galai bai tai wa sai. Shi gaw, Alexandria mare kaw na Jau langai mi tai lai wa yu sai Arius ngu ai Hpung htak ai wa a shut shai sharin shaga lam hpe hparan ning hkap na lit mung gun hpai lai wa sai rai nga ai.

Dai Arius gaw, Madu Yesu Karai Kasang atai n lu ai, masha atai sha lu ai, nga nna grai shut shai ai lam sharin lai wa ai. Tsun mayu ai lam gaw, Madu Yesu gaw, Karai Kasang n re ai, Shing gyim masha sha rai nga ai, ngu mayu ai lam re. Dai shut shai sharin ya ai mang hkang hte seng nna, Nawku Hpung gaw, A.D (325) Ning hta Nice Mare Kaba na Zup Hpawng (Council of Nicaea) Kaba galaw nhtawm, “Homousian Doctrine” ngu ai ga baw hte Arius hpe mahtai jaw ya sai raitimung, Arius a shut ai sharin shaga lam gaw, matut ding yang dingbai dingna jaw ya nga ai. “Homousian Sharin Hkrang” hta Madu Yesu gaw, Kawa Karai Kasang hte maren Karai Kasang atai lu ai, ngu nna hkap la let sharin ya ai. Dai sharin shaga hkrang masa hpe n hkap la ai Arius a hpang hkan masha ni gaw, Hkawhkam hte uphkang aya lu ai ni a man kaw mi man lu ai ni rai nga ma ai.

Dai majaw, shanhte a sharin shaga masing hpe hpan shagu hte lachyum htai shabra lai wa ai; mahkawn mangoi ni hte mung shara nna dingbai dingna matut jaw lai wa ma ai. Shanhte gaw, A.D (355) ning laman hkan e grai awng dang lai wa masai rai nga ai. dai majaw, Ja Chyum Mungga hte seng ai ningbaw kaba rai nga ai, San Pra ai Jerome gaw, Arius a hpang hkan masha ni mungkan maungdan shagu law law kaw kabu awng dang ai hpe mu nna, “Masha shagu ngu na daram Arius a masha zawn tai mat masai” nga nna grai yawn let tsun lai wa yu ai.

Arius a sharin shaga ai lai masa hpe ninghkap ai Saradaw ni hte Saradaw Liberius hpe mung kadai ahkyak n tawn ai kaw du mat wa ma ai. San Pra ai Athanasius mung (17) ning laman hta (5) lang numdaw shi a shara kaw nna gawt shapraw kau ai hkrum nu ai. Shi hpe sat kau na matu gyam nga ai ni a lata kawn lawt lu na matu zaibru jang kaw tara shadik ai tawra ni kaw (2) lang sa hprawng shing byi nga kau wu ai.

San Pra ai Athanasius gaw, A.D (364) ning hta shawa wu wu di di rai Alexandria mare kata de awng padang ninglaw hte nan bai du shang wa lu sai rai nga ai. Bai nna, Kahtawlik Nawku Hpung a Makam Masham hpe tang du hkra makawp maga da ya sai sha n-ga, n myit mada lu ai kaw na Nawku Hpung hpe awng padang jan mau shagup da ya lu sai rai nga ai.

Shi gaw, San Pra ai Anthony a labau hte manu dan la di kai laika ni hpe ka da ai hpang A.D (373) ning hta Madu kaw yup pyaw ban sa mat wa sai rai nga ai.

Shi n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, May Shata Praw (2) ya shani ngu masat shagrau dat ya sai rai nga ai.

Daini Nawku hpung gaw, San Pra ai Athanasius a Poi hpe galaw nga ga ai hte Maren, anhte hpung masha ni mung, San Pra ai Athanasius zawn Nawku Hpung a jaw teng ai sharin shaga lam ni hpe atsawm sha hkan nang hkan sa let, tinang a dum nta masha ni, manaw manang ni lama na Nawku Hpung a matsun sharin shaga lam ni hpe shut shai ai hku nna hkap la wa jang, lam madun woi lakawn ya lu ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)