Alexandria Mare Kaw na San Pra ai Cyril a Poi Nhtoi (June 27) 27 June 2023

Alexandria Mare Kaw na San Pra ai Cyril a Poi Nhtoi (June 27)

San Pra ai Saradaw Cyril gaw, Egypt Mungdan, Didouseya Ginwang, Circa Mare kaw lai wa sai A.D (376) ning hta shangai chyinghkai wa sai rai nga ai. Shi gaw, Jau tai wa ai hpang Shi a Kawa di rai nga ai Alexandria mare na Saradaw hpe garum ya wu ai. Kawa di n nga mat ai hpang shi a hkang galai tai wa sai rai nga ai.

Chyoi Pra ai Nu Maria hpe n gawn n sawn rai, Karai Yesu a Kanu n re nga nna shut shai tara sharin ya ai Nestorius hpe mung aja awa ning hkap kau ya lu ai majaw, Shi gaw, Doctor of Incarnation (Karai Yesu Masha Atai Sa La ai lam hte seng ai Hpaji Ninghkring) ngu nna shagrau masat hkrum sai rai nga ai.

Saradaw Cyril gaw, Constantinople mare na, Saradaw Lit Magam hpe A.D (428) ning hta gun hpai la ai rai nga ai. Dai shaloi, Nestorius gaw, Yesu gaw marai lahkawng Karai Kasang hte Shing-gyim masha rai nna ndai marai lahkawng hpe myit mang “Joined only by moral union” hte sha langai ngu shadu ai re nga nna shut hta shut shai hkra matut sharin shaga ya taw wu ai. Dai majaw, Nestorius gaw, Madu Yesu Shing-gyim atai sa la ai “Incarnation” hte Nu Maria gaw, Karai Kasang a Kanu “Divine Motherhood of Mary” rai nga ai lam hpe tsep kawp n hkap la ai lam dan leng nga ai.

Ndai shut shai tara hte seng nna, Saradaw Cyril dung lawm ai, A.D (431) ning na Ephesu Zuphpawng Kaba “Council of Ephesu” hta Wa Sarabyin Celestine (1) gaw, Nestorius hpe Nawku Hpung kawn (Excommunicated) shapraw kau nu ai.

San Pra ai Saradaw Cyril gaw, ngam nga ai shi a Asak Hkrung ten hta Nawku Hpung a makam masham hpe madi shadaw makawp maga ya ai laika ni law law ka kau da wu ai. Saradaw Cyril gaw, Nu Maria gaw, Karai Kasang a Kanu rai nga ai lam hte seng nna ning tawn ai hpaji ninghkring langai mi mung rai nga ai.

San Pra ai Saradaw Cyril gaw, A.D (444) ning hta Madu kaw yup pyaw ban sa mat wa sai rai nga ai.

Shi n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, June shata (27) ya shani masat shagrau dat ya sai rai nga ai.

Daini Nawku Hpung gaw, Alexandria Mare Kaw na San Pra ai Cyril a Poi Nhtoi hpe galaw nga ga ai aten hta, anhte a hpung masha ni a prat hta mung, tinang a makam masham hte seng nna, jaw teng ai lam hpe rai jang, n hkrit n kang ai sha gwi gwi sak se hkam makawp maga gwi ai ni byin tai lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)