Shut Na Hkum Hkrit ( Youth program )

Anhte myen mungdan kata nga ai masha ni hpe maram yu ai shaloi, malawng maga gaw, tinang a kashu kasha ni, lama ma galaw shut kau yang, gayet, adup abyem, dam jaw rai, ma ni hpe mara shagun let, sharin shaga chye nga ai hpe anhte ni mu mada nga, hkrum sha nga ga ai. Ndai zawn re ai kun dinghku, wuhpung wuhpawng,makau grup yin hta nga kaba wa ai a majaw ramma ni hta gwi hkrim ai myit nnga mat ai.

 Shut na hpe sha hkrit tsang mat ai a majaw hpa nung ngalaw gwi mat ai. Dai majaw shangun yang she chye galaw, gwi galaw ai madang de du mat wa ai. Ngup a mayam tai mat wa ai.Kadun ai hku tsun ga nga yang, tinang a hkum hpe tinang nkam gwi mat wa ai. Hkrit tsang ai myit gaw tinang hpe ka-up dang kau ai majaw, karai kasang jaw da ai tinang a atsam marai dat shakut na myit, madu hkum hpe madu kam hpa ai myit ni yawm mat wa ai. Kaja wa nga yang, prat mi hta kalang mi pyi nshut yu ai masha gaw nnga na re. Shinggyim masha shagu gaw shut chye ai ni hkrai rai nga ai. Karai kasang chyawm gaw mara dat ya ai wa re.Nshut ai tara agyi, nsi ai tsi sara ngu nnga ai. Ramma ni hkum tsun, mahkrum madup law sai masha kaba ni pyi shanhte hte seng ai magam bungli ni hta shut shai ai lam galaw hkrup chye nga ai.

Prat mi hta kalang mi mung nshut yu ai ngu ai masha gaw, hpa mung ngalaw ai wa re, nga nna hpaji chye ai ni tsun da ma ai. Anhte a sak hkrung hkawm sa lam a matu, shachyen shaja galaw sa wa ai shaloi, tinang hta bungli mahkrum madup nlaw shi ai majaw shing nrai, tinang galaw ai bungli hta kungkyang ai lam nnga shi ai majaw shut shai ai lam galaw hkrup na chyalu sha rai nga ai. Raitim, dai tinang galaw shut sai hpe, hpa majaw shut ai, gara hku na shut mat wa ai ngu sawn dinglik yu ra ai. Tinang hkum hpe tinang san jep yu nna jaw ai hku bai sharai la let hpang de bai nshut kahtap na matu shakut wa ra nga ga ai. Ndai hku galaw lu na matu gaw, tinang galaw shut kau sai hku, hkap la gwi na ahkyak nga ai. Shut tim shut ai nshadu, shut ai hku nmu, shut ai hku nhkap la gwi yang bai sharai la na matu mung yak nga ai.

Ramma ni, tinang hte seng ang ai magam bungli galaw sa mat wa ai shaloi, shut na nhkrit ga, shut na hkum hkrit, mi ngu tim myi di na hpang, shawng hpang nmyit yu ai gaw nre. Hpa mi galaw na raitim, galai ngalaw yang, shawng myit ra nga ai, Shawng nmyit yu ai sha, ga hkum mi pyi galoi hkum tsun, ahkyak ai ga  garai ntsun yang nlaw htum, Second shi tau nau nna, shawng myit yu u nga nna tsun da ai ga ni anhte na yu na rai nga ai. Dai zawn sha, tinang galaw na bungli gaw, tinang a matu shing nrai, masha ni a matu kaja nga ai kun? nkaja nga ai kun? Akyu rawng ai bungli re kun? nre kun? ngu nna shawng myit yu ra nga ai. Dai hku shawng myit yu nhtawm, kaja sai, hkrak sai rai yang gaw, ya ya jang galaw dat u. Hpa myit hkum ung ang taw sa. Galaw nga ninglen, shut ai lam ni mu wa na re. Mu u ga, hkum hkrit u,  “ There is no mistakes, Only Lessons” “ Shut ai ngu nnga ai, yawng gaw hpaji la hpa hkrai rai nga ai” Masha ngu ai gaw galaw ninglen, Shut ninglen, shut ninglen, sharai dingyang di let, hpang jahtum awng padang lu la ai ni  hkrai rai nga ai.

Madu  karai kasang mung anhte marai hkum shagu hpe lak lai ai law htam ai atsam chyeju jaw da ya nga ai. Dai shaman chyeju hpe tup hkrak jai lang let, tinang tsap ra ai shara hta, gwi gwi tsap ga. Tinang galaw ra ai magam, tinang galaw mayu ai bungli ni hpe gwi gwi galaw ga. Shut na hkum hkrit!

#crdpaulz(kachyihtu)

#youthprogram

#rvakachinservice