Pan Dung Ni Hpe Hpran Ai lam ( Youth Program )

An-hte ramma ni yawng hta, yaw shada da ai pan dung ni gu dek nga chyalu rai ng ai. Dai gaw lani mi hpa byim wa na ngu ai baw ni rai nga ai. Raitimung, ngang gring ai pan dung lam gaw nrai nga ai. An-hte ni gaw asak kaba wa magang Yaw shada pan dung ni gaw law wa magang rai nna, grau grau shuk wa magang she rai wa nga ai re. Ramma law malawng gaw yaw shada lam langai hpe masat u ngu yang, Ja gumhpraw law law lu mai ai bungli langai hpe lu na, hpaji langai hpe madung da nga ma ai hpe law malawng mu lu nga ai, kaja wa dai bungli hpe myit lawm ai i? ngu yang mung myit nlawm nga ai law nga ai hpe mu lu nga ga ai.

Dai hta e, nang gaw hpaji lam yan langai  hpe sut masa a matu lata mayu ai i? Kaja wa tinang myit lawm ai hpaji hpe sha lata mayu ai i? ngu hpe gaw tinang hkum tinang bai san yu ga ngu tsun mayu nngai law. Masha law malawng gaw, chye myit sai asak aprat kaw na, yaw shada pan dung ni nga ga ai,. dai hta nkau ramma ni gaw, Tsi hpaji du  kaba, nkau gaw engineer, ngu zawn re ni raitim, masa amyu myu a majaw, tinang a pan dung ni hte shai mat chye nga ai. Raitimung masha shagu malai pan dung ngu ai bai nga nga ga ai re. Nang n-sen nkaja ai majaw yungwi ninghkring n-byim wa tim, kaja dik htum ai mahkon ka sara gaw mai byim nga ai re. Ga shadawn n-gun jaw mayu ai gaw, Tsi du kaba byim mayu ai ramma langai tsang 10 hta amark n-dep mat tim shi a jet ai yaw shada lam gaw, masha ask hkye ai lam re majaw, dai hte matut manoi ai hpaji hpan ni rai rai, nurseing dakkasu mi rai rai, shawk n-na, hpaji lu hkra mai shakut nga ai hpe n-gun jaw mayu nngai. Tsawra ai Ramma ni, yaw shada lam hpe jahkrat ai ten, tinang kaja wa sha, myit lawm ai lam hpe jahkrat na matu sha n-gun jaw ai . Dai hta nang hpa pan dung yaw shada lam jahkrat  na nchye taw ai kun? dai re yang nang laika law law hti na hpe sha n-gun jaw mayu ai. Lai ka hti ai ngu hta mung magup sum hpa jut shagu kaw na yu mada hti ra nga ai , laika law law hti ai ten, nang kaja wa sha myit lawm ai lam yan de, nang hkum nan ndum dat ai sha du mat na ra ai. Ten na wa yang nang hkum nan hpa hpe myit lawm nga ai lam chye wa na ra ai, nkau ramma ni gaw shi myit lawm ai ginwang hta lu su lam, nlawm ai a majaw tinang myit lawm ai lam hpe tat kau nna, gumhpraw a hpang hkan nang chye nga ma ai. ndai hku galaw dat ai a marang e, hpang de myit shang sha mat yang gaw hpa nratim, myit shang sha lam bai nnga yang gaw pan dung mat nna sak prat ni lachyum n-nga byim mat chye nga ai re.

Bai yaw shada pandung lata  ai shara hta tawn da gring ai myit masa langai hpe mung tsun dan mayu ai. Nang pan dung langai jahkrat sai nga yang, dai yaw shada lam a majaw, nang jam jau lam ni hkrum yang hkrum wa na, masha ni nga ai hku, hpun ai hku rai yang she rai na, raitim dai jam jau lam hpe lu hkam ra ai, dai mayak ni hpe lu hkra tawt lai la na ngu ai myit marai rawng ra na re. na manang wa, laga hpaji masa hte awng dang taw ai ten, na myit hta, byim wa na, ngai myit shang sha taw ai lam shut sai kun? ngai hka ja shakut ai hpaji, shanhte  hkaja ai hta akyu nga ai kun? ngu zawn re ni hpe ngai hpa na n-awng dang ra na, ngai hkaja ai hpaji gaw shan-hte hta grau yak ai maja rai nga ai. Nye hpaji hte seng nna, ngai hpa naw matut hka ja ra na, ahkaw ahkang ni hpe gara hku tram ra na, ngu zawn re ai ni hte, galai bang ra nga ga ai, dai hku myit na nga yang mung, nang kaja wa sha myit lawm ai hpaji hpe pan dung hku nna, lata dat ai mung teng sha rai ra na re. Tinang a pandung hpe lata ngut sia nga yang mung loi loi hte asum njaw shangun mayu ai, shadawn shadang langai du hkra gaw shakut ga ngu, masha shagu gaw asak kaba wa magang, grau kaja ai yaw shada lam ni de galai mat chye nga ai. Gara hpaji mi rai rai, mayak gaw nga chyalu re majaw loi loi hte gaw asum njaw, shakut ga ngu tsun mayu ai. Yaw shada pan dung hpe hkrak, masat ngut sai nga yang, dai pan dung hte seng ai hpe sha myit maju jung shangun mayu ai, muk seng kaw muk ni grai law ai hta, ndai mung sha mayu, aw ra mung sha mayu byim nna, jahtum  gaw hpa mung nlu sha ai zawn byim mat chye nga hpe  mung dum let law law chye ai ngu mung nkau hta, kaja nga tim , nkau sha ra hta nkaja lam ni mung byim chye hpe shadum ya mayu nngai law.

Tsawra ai ramma ni na a yaw shada pan dung hpaji lam hpa mahkrum nmu shi nga ai rai yang mung, English laika hpe kung kyang hkra hkaja  ding yang rai nga shangun mayu ai. Hpa majaw nga yang hpang de nang matut hkaja na lam yan ni hta english laika hku sha hka ja ra na re majaw akyu n-yawm ai ngu tsun n-gun jaw mayu ai, nkau ramma ni gaw, ten lai nna she tinang myit lawm ai lam hpe mu tam chye ai ni mung lawm chye nga ai re. myit nlawm ai bungli hpe galaw taw na malai tinang myit lawm ai lam hpe galaw lu ai gaw prat hpe grau lachyum rawng shangun nga ai re. Tinang myit nlawm ai magam hte awng dang taw tim, jet ai myit pyaw lam gaw lu na nrai nga ai. Hpa lam mung hpang hkrat ai nnga ai raitimung dai ten hta laga masha ni hta grau myit shang sha lam gaw nga  ra nga ai, bai ahkrak ai langai gaw, masha law malawng yaw shada pan dung hte seng ai hta manaw manang ra nga chye ga ai. ga shadawn, sharin hpawng a matu manang wa nlawm yang nlung byim ai zawn re ni, tinang hte rau hkaja na manang n-nga ai a majaw,n-galaw byim ai lam ni rai nga ai, dai hta mai gan na hpaji du ni, uhpung ni gaw, anhte  hta grau ai gaw shanhte gaw shanhte a yaw shada lam pandung hpe shawng madung da ngut ai hpang she ngam nga ai ni hpe galaw chye ma ai lam re.

Shan hte ni yawng gaw, tinang hkrai hkaja nga ma ai ni rai nga ai,ndai hpaji hpe hkaja let, myit lawm ai shada chyawm byim wa nna. wuhpung langai byim wa nga ma ai bai, anhte myen mung masha ni hte shai hkat ai lam langai gaw, shanhte gaw lani mi ndai hpaji hte seng nna, 1hr  hka ja na nga yang shani shagu 1hr mi sha hka ja nga ma ai hpe mung mu lu ai . Anhte myen mung kaw nga ai ni galai shai ra ai gaw, myit lu yang sha chye galaw ai akyang rai nga ai,nang myit lawm ai hpe lani mi yawm htum 1hr chyen, 1hr ram gaw aten jaw u ngu tsun mayu ai, madung gaw laika law law hti u , dai laika hta anhte chye mayu ai ni law law nga ai hpe n-gun jaw mayu ai. Masha shagu a prat e jaw ai akyu ara ngu nga nga ga ai. Dai gam maka hpe anhte ni galai shai nlu nga tim, shawng lam pan dung ni hpe gaw, tinang hkum nan galaw la lu nga ga ai. Gam maga ngu gaw bungli sha rai nga ai, Tinang awng dang na matu tinang nang galaw yang she lu na re. dai hta e, tinang a yaw shada lam, awng dang  lam ni a matu galoi mung bai dinglik yu na gaw n-mai malap nga ai, anhte a mungkan hta, tinang hpe yu kaji ai lam gaw hpa hte mung malai nlu bang ai. Hkam sha lam langai re majaw, mahkyen lamang langai hpe masat jahkrat ngut yang mai byim dang di ai daram, ngut hkra galaw u, ngam nda ai sha ,yaw shada pan dung hpe lawan ai hku du na hta, madung ngu nga the lahkam sa lu hkra shakut ga ngu tsawra ai ramma ni hpe shadun n-gun jaw mayu ai.

Tang Madun Ai- John Nnye Sengtu

#youthprogram

#rvakachinservice

#aungnanmyitkyina